(NTN24) – Un caso nobo ta sacudi e pais, specificamente e comunidad di Morelos na Mexico unda un muhe a ser kima bibo cu gasolin.
Margarita Ceceña di 30 aña a muri dia 24 di juli ultimo na Instituto Nacional di Rehabilitacion di e Ciudad de Mexico, despues cu pareha di su prima a atak’e cu gasolin y despues kim’e.
E atake contra Ceceña a tuma luga 1 di juli di 2022 y a provoca kemaduranan na 70% den su curpa. Te ayera e sospechoso tabata ‘Primitivo N’, e tabata pareha di e prima di Ceceña, ken a kim’e pa via di un propiedad familiar ubica na Merca.
Segun e tantanan di Margarita e conflicto a origina pa motibo cu e cas di un familiar den comun a ser laga den man di Primitivo N y e prima di Ceceña. Sinembargo, nan no a mantene e cas di un manera debi y nan a huur e sin autorisacion. Ora e doño di e cas a haya sa, el a entrega e propiedad na Margarita.
“Nan tabatin problema pa un cas cu un familiar den comun a laga den man di e dos persona pa nan por haci e mantencion, pero e personanan ey a cuminsa huur e cas y e doño a haya sa y a kita e cas for di nan pa duna Margarita. Esey tabata e rabia cu nan tabatin pa mi subrina”, un di e tantanan di Margarita a sigura.
Ademas, e tanta a afirma cu un luna prome cu e atake, Margarita a yam’e pa bisa cu su prima den compania di su pareha a golpie.
Margarita a ser kima na su cas, luga na unda Primitivo N a yega cu un machete y a procede na agresion verbal pa despues comete e atake contra Margarita, cu a caba den cuido intensivo y despues a muri di un ataca di curason.
Margarita Ceceña tabata un mama soltero cu tres yiu. E caso nobo di feminicidio aki ta yega dianan despues di e caso di Luz Raquel Padilla, ken tambe a ser kima bibo cerca di su cas.
Tanto Margarita como Luz a haci nan denuncianan na instancianan pertinente, pero autoridadnan no a reacciona ni a actua na tempo.
