Sindicatonan ta lamenta cu ainda mester warda ariba e 7.6%

Ayera mainta durante un conferencia di prensa, e grupo sindicatonan SADA, SIMAR, SPA y organisacion OPPA a reacciona ariba e 5% cu Gobierno di Aruba a duna back na e trahadonan di sector publico y semi-publico, cu tin mas di dos aña entregando 12.6% di nan salario.

Manera ta conoci, siman pasa empleadonan publico y semi-publico a haya e 5% di nan salario back, locual kiermen cu e luna cu a pasa ‘ki e empleadonan a cobra 100%. Edward Maduro, presidente di sindicato SADA a gradici tur e miembro y no-miembronan cu a para tras di e sindicatonan, cu a urgi e sindicatonan pa para pa nan derecho. “Manera boso tur sa si no tin miembro, si no tin esnan cu ta pusha e directivanan aki, nos no por haci nada. Nos ta traha na nan bienestar, segun nan deseonan”, el a expresa.

Maduro a remarca cu desde 2020, ariba mandato di e miembronan, nan a sali demostra nan disgusto cu e manera con Gobierno di Aruba, na un manera ad hoc unilateral, a kita 12.6% for di e miembro y no-miembronan.

El a menciona cu aki na Aruba, contrario na por ehempel Corsou, nan no a haya ningun tipo di oportunidad pa negocia na ki manera ta bay duna ayudo, duna sosten. Pero gobierno unilateralmente a kita e 12.6% di e sector publico y semi-publico y esey ta locual semper e sindicatonan a vocifera.

“Nos kier a gradici tur esnan cu a para tras di nos pasobra si no ta pa nan, awe nos por bisa cu berdad por ta nos tin e 5%, pero por ta nos tabata 13 dia ATV short, pasobra gobierno na un manera tactico kier a purba pasa nos un fast ball di bin cu un inruil; pero nos a bisa nos no ta bay den ningun tipo di inruil y entrega ATV dagen, dianan liber, a cambio di 5%”, Maduro a agrega.

Maduro a indica cu lamentablemente na Aruba gobierno tin un poder unda “aparentemente” sindicatonan no tin mucho di bisa y mucho di haci, pasobra ora nan acerca Parlamento nan ta haya cu Parlamento ta para tras di gobierno y eynan ta caminda, Maduro a resalta, cu di nan banda, compara cu por ehempel Corsou, ta hopi zwak y no ta cuestion cu nan no kier a lucha.

E sindicatonan, Maduro a subraya, ta lamenta cu nan tin cu warda riba e 7.6% cu falta ainda. El a enfatisa cu den nan opinion, Gobierno di Aruba por paga e 12.6% completo entrante augustus e aña aki, pasobra manera Secretario di Estado a indica na e sindicatonan, e ta keda na gobierno. Unabes cu Aruba no ricibi sosten di likides mas, gobierno por a dicidi na su manera con pa elimina e recorte di 12.6%.

El a remarca tambe cu gobierno ta keda subi gasto di goederen en diensten y ta keda subi gasto di personal. Pero na mesun momento el a enfatisa cu unabes nan bisa cu ta subi gastonan di personal, nan lo tende di minister cu nan mes a haya hende nobo; pero pa loke ta trata e orde diensten, esakinan ta servicionan esencial pa un pais por draai. “Unda cu mester, mester, pero ni unda cu no mester y bo ta keda aumenta personal. Esey ta nos dolor ora cu ta bisa cu ta subi gastonan di personal sin cu tin mester”, el a agrega.

Maduro a trece pa dilanti e punto tambe di cifranan cu ta disponibel pa e sindicatonan. El a splica cu gobierno ta mustra cifranan cu diagram bunita y colorido, pero esey no ta duna nan mucho informacion. El a subraya cu nan kier cifranan concreto y nan a yega di bisa caba cu nan kier haya breakdown concreto pa loke ta trata e cifranan. Pero hopi biaha nan ta wak cu e cifranan no ta completo of no ta full transparente. Eynan, el a señala, ta caminda nan ta bisa nan kier wak tur cifra pa wak si berdad gobierno no por a paga e 12.6% completo.

Maduro a destaca cu e lucha no a caba y ainda falta, pasobra for di 2018 nan ta wardando e indexering riba cual nan tin derecho tambe. El a comenta cu gobierno tin dos rol, e tin e rol di maneha un pais, pero e tin e rol di duna bo di trabao tambe y el a señala cu e ultimo añanan aki e tabata un dunador di trabao cu no a duna mucho bon ehempel.

“Ainda nos tin hopi temanan riba mesa cu nos no ta cla cu nan. Pa e motibo ey nos lucha no a caba, ainda falta nos 7.6% Nos trabao no a caba ‘kinan, hopi hende ta contento cu tin e 5%, hasta esnan cu a critica nos, pero nos lo sigui lucha”, el a indica.

Maduro a agrega cu e sindicatonan ta para hunto cu e organisacion OPPA cu tambe ta lucha pasobra te dia di awe nan tampoco no a haya ningun tipo di update pa l nan situacion, na unda a kita 50% for di nan gelijkbedrag y bashipremie cu a wordo kita na 2020.

Ivo Valdes, presidente OPPA, a splica cu aunke OPPA no ta sindicato, e ta para hunto cu e sindicatonan pasobra OPPA ta den un lucha continuo pa reconocemento di e pensionadonan publico cu a traha tanto aña den e comunidad aki pa tur locual tin awendia y tambe ta forma parti di un comunidad.

“Ora gobierno wordo eligi, e tin su prioridadnan cu e tin cu eherce. Tempo cu e gobierno aki a bin na mando, el a bisa cu hende ta central, esey kiermen cu e pensionadonan tambe ta central. Dicon si e pensionadonan ta central, despues di a cumpli cu e trayecto di trabao ainda bo ta mishi cu e parti cu ta di nan?”, Valdes a expresa.

El a remarca cu OPPA tambe a contribui dos aña largo y den luna di december gobierno a kita 50% di nan gelijkbedrag. El a enfatisa cu no ta husto, mescos cu nan a kita na 2015 e gelijkbedrag di tur e pensionadonan cu a baha cu pensioen desde 1 di januari 2015 cu tampoco ta husto, aunke nan ta acusa OPPA y Ivo Valdes di a forma parti di e decision ey, “esey no ta berdad”.

Por ultimo Valdes a indica e pensionadonan publico ta wardando december yega pa wak si nan ta cobra nan gelijkbedrag completo. “Mi ta spera cu debi na cu nan a paga e 5% na e ambtenaarnan, gobierno tene cuenta cu su pensionadonan y paga esey tambe completo”, el a finalisa.