(Infobae) – Ta spera cu Secretario di Defensa di Merca, Lloyd Austin, ta bay pidi na militarnan pa respeta democracia den un reunion di defensa di henter continente Americano, cu ta bay tuma luga e siman aki na Brazil, segun un alto funcionario di defensa di Merca a comenta.

Ta probabel cu e comentarionan aki, aunke no ta bay ta dirigi na Brazil specificamente, por hala atencion di e region, debi cu e pais ta proximo pa tene eleccion presidencial dia 2 di october. Presidente Brasileño, Jair Bolsonaro formalmente a lansa su candidatura pa reeleccion diadomingo ultimo y a bisa cu “Ehercito ta na nos banda”.

Austin, cu ta un general retira for di ehercito, ta bay dirigi e conferencia di ministernan di Defensa cu e fin di sostene palabracionnan bilateral cu varios delegacion regional for di ayera te awe.

Bolsonaro ken tabata capitan di ehercito, a bisa na diplomaticonan na comienso di e luna aki cu e ta kere cu mester yama ehercito Brasileño pa yuda garantisa e transparencia di eleccionnan di 2 di october. El a pone presion riba autoridadnan electoral pa nan acepta un conteo di voto paralelo den man di forsa arma, loke a keda descarta.

E tipo di ideanan aki a causa consternacion pa observadornan di Brazil na Washington. Congresista Mericano Tom Malinowski, democrata y miembro di Comite di Asuntonan Exterior di Camara di Representantenan, a señala cu “Austin simplemente lo mester laga cla cu militarnan mester mantene den margen di eleccionnan y permiti cu cualkier discusion tocante eleccionnan por keda resolvi via medionan constitucional,” tambe cu “mester recorda na su homologonan cu ley Mericano ta restringi cualkier cooperacion cu militarnan stranhero cu ta participa den cualkier cos cu por parce un golpi di Estado”.

Lidernan militar a bisa varios biaha cu forsa arma di Brazil ta bay respeta cualkier resultado di eleccion.

Departamento di Estado di Merca a afirma su confiansa den sistema electoral di Brazil, un paso distinto den un campaña cu hopi presion. “Nos no kier mete memey di eleccionnan di Brazil, no. Pero si nos kier sigura e hecho cu nos ta kere cu e sistema electoral di Brazil ta creibel y capaz di haci gestion di eleccionnan liber y husto” alto funcionario di Defensa di Merca a bisa.