Ayera mainta, minister di Husticia y Asuntonan Social, Rocco Tjon a duna un conferencia di prensa pa trece dilanti informacion tocante departamento di Cuerpo di Bombero di Aruba, cual a conoce hopi reto den diferente aspecto e ultimo añanan.

Retonan hopi grandi cu conhuntamente cu management team, sindicato y personal a logra resolve varios di nan caba, y ayera minister Tjon a declara cu siman pasa nan a aproba e suma di 2.2 miyon florin cu tabata falta pa finalisa e compra di cuater truck pa departamento di Cuerpo di Bombero di Aruba. “Cu e compra aki pa nos añanan dilanti e fleta pa e dienst di Brandweer lo ta bon”, el a sigura

Banda di esey tambe, siman pasa a yega e pañanan special pa tur bombero, unda cu for di awor nan por cuminsa haci nan trabao mas sigur pa nan mes.

Den e conferencia di prensa aki, minister Tjon a mustra par di potret cu e lector tambe por aprecia den e edicion aki, cu ta ilustra con e taira di un di e trucknan tabata; ademas con e personal tabata bay traha cu sapatonan kibra y cu e condicionnan cu e cual nan tabata haci nan trabao no tabata bon, loke tabata representa un peliger pa nan mesun seguridad.

Den plan di maneho di Ministerio di Husticia y Asuntonan Social, minister Tjon a splica cu den e prome parti nan a menciona cu ta importante pa personal cu ta eherce nan trabao haya e hermentnan tambe pa nan por haci esaki na un bon manera, y mas importante, di un manera mas sigur pa nan mes.

Igualmente siman pasa a yega aparatonan di hala rosea cu a wordo busca pa tur bombero, pa asina den añanan dilanti e departamento di cuerpo di bombero lo ta bon ekipa cu e aparatonan aki. Ultimo biaha cu a busca e sorto di aparatonan aki tabata tempo di gabinete Oduber 1 na aña 2003; y na 2018 ex-minister di Husticia Andin Bikker tambe a busca algun pa un grupo, pero no tur bombero por a haya esaki. Banda di esey tambe a bestel uniform y nan a haya handschoen y helm nobo, entre otro hermentnan pa asina nan por eherce nan trabao miho.

Igualmente el a mustra potretnan di trucknan cu ta ilustra cu ya caba algun di nan ta den produccion. Manera ta conoci, ta tarda hopi luna prome cu por traha e trucknan aki, prome cu nan keda cla.

Banda di material, minister Tjon tambe ta haya importante pa e posicion huridico di e trahadonan ta bon regla, esaki tambe tabata un parti di e departamento cu tambe tabata conoce hopi reto. Tjon a bisa cu e ultimo lunanan hunto cu sindicato, management team y Departamento di Recurso Humano a percura pa nan por haal in full e retraso. El a anuncia cu tur promocion aworaki ta na Gabinete di Gobernador, su excelencia Alfonso Boekhoudt, pa nan por wordo firma despues cu Conseho di Minister a aproba tur esaki y cu aworaki ta den e fase final pa regla e posicion huridico di tur personal di departamento di Cuerpo di Bombero di Aruba, cu pa hopi aña mester a warda pa esey keda regla.

Minister Tjon tambe a informa cu no solamente a adkiri tur e materialnan aki, sino tambe a haci palabracionnan cu companianan Mericano relaciona cu training pa personal di cuerpo di bombero, y nan a haya informacion tur training necesario. Segun loke el a compronde for di sindicato y di management team, e ultimo training pa esaki a tuma luga na 2007, loke ta nifica cu pa hopi aña nan no a haya training di un manera adecua. Igualmente cu e promocion tambe tabatin opleiding cu mester a duna, unda cu algun di nan a cuminsa caba y otronan ta cuminsa proximo luna.

“Obviamente esaki ta hopi importante pa e bon funcionamento di e departamento, pero tambe ta importante pa e carera di e personal mes”, Tjon a declara.

Post di Cuerpo di Bombero Aruba di San Nicolas ta den pleno renobacion segun minister Tjon a afirma y e lo mester ta completamente cla pa fin di aña.

El a destaca e manera constructivo con sindicato a atende cu tur e aspectonan aki. For di algun aña caba e departamento a mustra mal contento pa falta di atencion pa e departamento mes, unda Tjon a anuncia cu e presupuesto pa e departamento aki pa aña ta consisti di alrededor di 2 miyon pa atende tur e puntonan necesario. Di esaki el a menciona cu adicionalmente a aloca 7.5 miyon florin pa tuma na cuenta e aspectonan aki den e periodo di e aña aki.