(NLTimes) – Despues di University of Amsterdam, Vrije Universiteit tambe a bisa studiantenan internacional pa no bay Hulanda si nan no a haya vivienda te ainda. Simplemente no tin suficiente vivienda disponibel pa e studiantenan internacional cu kier studia na Amsterdam, Het Parool a reporta.
Si bo no tin un camber prome cu dia 1 di augustus, VU Amsterdam a conseha contra di studia na e universidad den e aña academico binidero. UvA a conseha studiantenan pa no bay e pais si nan no tin vivienda prome cu dia 15 di augustus.
Te cu awo 72,769 studiante a registra pa studia na e dos universidadnan na Amsterdam den e aña academico aki. 17,987 di nan ta studiantenan internacional. Registracion te ainda ta habri, cual ta nifica cu e cifra aki por aumenta.
Durante e dos añanan recien, e universidadnan a aregla shelternan di emergencia pa studiantenan cu no por haya vivienda den e pais na hostelnan y parkenan di vakantie. Esakinan tabata relativamente bashi pa causa di restriccionnan di viahe relaciona cu coronavirus. E studiantenan por a keda na e sitionan aki mientras nan tabata busca un cas. Esaki no ta un opcion mas.
Siman pasa, e union di studiantenan nacional LSVb, tambe a bati alarma tocante e escasez di vivienda di studiante na Hulanda. Segun e union, tin hopi mas studiante cu a registra den e institucionnan Hulandes educacional compara cu e cantidad di acomodacion disponibel.
