Recientemente, Bureau Central di Estadistica (CBS) a publica su Consumer Price Index (CPI) pa Juni 2022. Den esaki, ademas di un aumento den e bestaansminimum, tambe ta destaca un aumento den e prijs di cuminda y servicio di catering.

Cambio di prijs di Cuminda y servicio di catering na Juni 2022

E indice di “Cuminda & servicio di catering” a registra un subida di 1.0% na Juni 2022, despues di un subida di 1.1% na Mei 2022. E indice di “Cuminda na cas” (1.2%) a registra un subida, unda shete (7) di e diesun (11) indicenan di e gruponan di cuminda na cas a subi na Juni 2022. E indice di “Carni” a conoce e subida di mas grandi (3.6%) na Juni 2022.

Otro subidanan significante a wordo registra den e indicenan di “Azeta y otro productonan traha di vet” (3.1%), “Pan y otro productonan di grano” (1.1%), “Bebida no-alcoholico” (0.9%) y “Restante productonan pa alimentacion” (0.8%). E indice di “Batata, yuca y batata dushi” (-2.2%) a registra e caida di mas grandi na Juni 2022.

Den e ultimo diesdos (12) lunanan e indice di “Cuminda & servicio di catering” a subi cu 9.5%. E indice di “Cuminda na cas” a conoce un subida di 11.1%, unda tur e diesun (11) indicenan di e gruponan di cuminda na cas a subi durante e ultimo aña. E indice di “Azeta y otro productonan traha di vet” a subi cu 24.3%, e subida di mas grandi entre e gruponan di cuminda na cas. Otro subidanan significante a wordo registra den e indicenan di “Carni” (13.7%), “Fruta” (13.5%) “Lechi, keshi y webo” (11.7%), “Pan y otro productonan di grano” (11.1%), “Pisca y otro cuminda di lama” (10.9%) y “Batata, yuca y batata dushi” (9.4%).

E indice di “Cuminda pafo di cas” a subi cu 0.6% na Juni 2022 y a registra un subida di 5.9% den e ultimo diesdos (12) lunanan.

Na Juni 2022, “Cuminda na cas” y “Cuminda pafo di cas” como grupo, tabatin un subida di prijs di 1.0% compara cu Mei 2022 y hunto tabatin un influencia di 0.16 ppt riba e CPI, mientras cu e restante bienes y servicio hunto a experencia un subida di prijs di 0.7% y tabatin un efecto di 0.59 ppt riba e CPI.

Bestaansminimum na Juni 2022

E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice

basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 15+) y un peso di 0.3 pa cada mucha (edad 0-14 aña). E bestaansminimum ta basa riba cifranan di e rapport “Bestaansminimum 2010” cu CBS a publica na December 2010 y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2)

mucha (edad 0-14 aña).

Na Juni 2022 e bestaansminimum mensual pa un hogar cu ta consisti di dos (2) adulto y dos (2) mucha (edad 0-14 aña) (Afl. 5.070) ta mustra un subida di Afl. 300 compara cu Juni 2021 (Afl. 4.770) y a wordo causa principalmente door di un subida di Afl. 209 den e sector di “Cuminda y bebida no-alcoholico”. Na Juni 2022 e bestaansminimum mensual pa un hogar cu ta consisti di un solo adulto ta Afl. 2.414, cual ta representa un deficit di entrada di Afl 599, un subida di Afl. 143 compara cu e deficit observa un aña pasa (Afl. 456). E deficit aki ta e di mas halto registra den un periodo di seis (6) aña pa luna di December.