Jeremy Ruiz: “Mi a logra deal y biba cu siete stem diferente den mi cabes”

Aunke el a enfrenta diferente situacion den su bida y a wordo diagnostica cu un condiciona mental cu ta schizofrenia, cu ta causa cu e ta scucha siete stem diferente, el a logra deal y biba cu nan tur dia. Awor Jeremy Ruiz ta sinti su mes feliz y trankilo.

Den un entrevista na Bon Dia Aruba, Jeremy Ruiz a informa cu tres aña pasa el a duna un presentacion na director di KIA y na algun departamento door di su lesnan, awor Ruiz a bin Aruba di vakantie y tambe pa contrae matrimonio cu su pareha Jennifer. Akinan el a splica cu e ta gusta bin Aruba pa conta hende cu ta interesa di scucha con e ta wak cierto aspecto di su bida, unda cu e ta gusta semper di haci algo back pa Aruba.

El a conta cu el a nace na Hulanda, el a bin Aruba for di chikito pa biba, pero ora e tabatin 25 aña el a dicidi di bay back pa asina busca un miho comprendemento di e problema di salud mental cu e tabata sufri, schizofrenia.

Bibando na Hulanda back, Ruiz a siña mira su malesa di un otro manera, “di un manera mas positivo, no manera un malesa, sino algo cu tin cu deal cune cu no necesariamente mester di remedi”.

E ta categorisa su mes como ‘scuchador di voz’ door cu e ta scucha siete diferente stem tur dia. E mes ta consciente cu e ta scucha nan for di cinco aña caba. Tempo e tabata chikito, cu 13 aña el a cuminsa experiencia cu substancianan adictivo y cu 19 aña el a wordo manda e prome biaha na un centro di rehabilitacion na Santo Domingo, unda el a keda dos biaha mas. Asina el a haya e diagnostico schizofrenia. “Esey mi kier sa cu tabata ora mi tabatin 21 of 22 aña”, el a bisa.

Ruiz a bisa cu awendia den e manera di psikiatria, na momento cu un persona ta haya un diagnostico cu ta scucha stem den su cabes, esey ta un sintoma di otro problema – manera ta sucede cu hende cu ta bay guera of personanan cu ta adicto na alcohol. Na medida cu tempo a pasa el a cuminsa haya medicamento pa purba di kita stemnan for di su cabes, pero esey nunca a logra.

“A cambio, mi a cuminsa haya efectonan secundario di medicamento, remedinan tabata hincha mi lenga, cada tres dia mi tabata drumi so pasobra remedinan a cuminsa acumula den mi sistema y mi no por a lanta door di remedi”, Ruiz a expresa.

Door di esaki, el a papia cu su tata y bis’e cu esey no tabata e manera pa biba, ya cu e stemnan cu e tabata scucha no a bira menos y e tabata hayando mas problema cu e remedinan mes, compara cu e ora e tabata usa e substancianan. Asina el a haya ayudo di su tata pa e por bay Hulanda y busca un otro manera pa siña deal cu e stemnan cu e ta scucha.

Na Hulanda el a topa hende di gruponan cu ta mira scuchamento di stem como un experiencia di sentidonan special. Ruiz a bisa cu eynan tambe tin hende cu ta experiencia di sinti cosnan den nan cuero, por ehemplo. A yega un tempo e cantidad di stem cu e ta scucha a aumenta, manera el a sigura, unda cu aworaki e ta tende siete diferente voz. “Mi mente a proyecta un forma na nan y mescos ora mi ta papia cu otro hende, ora mi ta papia cu nan mi ta wak nan.”

El a declara cu su famia ta un ayudo hopi grandi den su bida y nan a acepta cu e stemnan ta un parti di dje y nan no ta purba di cambi’e. “Nan a keda stima mi semper, aunke por ta nan no ta compronde of nan no sa, como tata, mama of casa; nan no sa kico e ta, pasobra nan no por sinti e of wak e. Pero nan sa cu bo partner, si e ta acepta su comportacion, su pensamento, su bida diario cu for di mainta cu mi ta lanta y te anochi cu ta drumi, mi ta soña cu mi stemnan tambe”, el a sigura.

Ruiz ta scoge momentonan den diferente ora di dia caminda e ta sinta y bebe koffie cu e stemnan. Un di nan ta “e Koffie Break” manera e ta yam’e, unda cu e ta sinta y papia cu su stemnan, haci un check list con e situacion di dia ta. “Mi approach ta mas bien wak kico mi stemnan mester pa mi haci nan contento, pa mi ta contento, pa nos ta contento, en bes di kita stemnan y haci comosifuera nan no ta existi. Mi ta deal cu e problema”.

Ruiz ta un persona cu ta duna les y e ta duna guia na personanan cu ta cera den centronan manera Respaldo, na Hulanda. “Mi ta purba yuda nan ora nan tin cu deal cu voznan problematico of voznan fastioso y e dia ey mi ta laga e stem di mas druk, esun cu mester di mas atencion – caminda mi tin un coleccion di texto, pintura, algo cu e voz eynan ta sintie refleha – y asina mi relacion cu e voznan a cambia. En bes di ta un enemigo di mi, nan a bira mas bien un amigo. Mi ta consciente cu cada voz tin su caracter y nan mesun manera di ta, mi tin un voz cu ta yama e pesimista, e nunca no lo por mira e cosnan di un manera bon. Pero cu tempo mi a siña cambia loke e ta bisa pa un yudansa.”

Antes el a indica cu e tabata sinti mas sin control pa via di e situacion cu e no tabata compronde, pero a base di bukinan cu e mes ta lesa, y di siña ervaringsdeskundige na e mesun instancia cu a yud’e, nan a duna e oportunidad pa e drenta den sistema di scol for di seis aña caba. Cada biaha cu ta cuminsa un klas nobo cu un grupo nobo na tres luga diferente di Hulanda, e ta duna su les cu su presentacion. “E base ta cu esun cu a pasa den e experiencia por yuda e otro miho pa deal cu e experiencia.”

Pa loke ta trata e sistema di Aruba, el a bisa cu si e no a haya ayudo 16 aña pasa e no lo a yega Hulanda. “Fundacion pa Maneho di Adiccion na Sero Colorado a coach mi, di eynan m’a sali. Nan a prepara mi pa mi bay Hulanda. Aunke mi no ta na Aruba aworaki, esey a yuda mi pa mi bay asina leu hunto cu mi tata, aunke por tin hende na Aruba cu ta bisa cu esey no ta trece su fruto, well mi por bisa cu toch, si a funciona cu mi.”

Su mensahe ta cu “tin biaha hende mester cuminsa wak cierto les di bida y cierto cosnan cu ta pasa cu hende na Aruba, unda cu nan tin cu kita e tabu riba dje pa combersa y papia di e tema. Djis duna algo un nomber y despues purba di haci comosifuera cu no ta existi door di duna remedi of djis wanta hende na cas, esey no ta e solucion. Mi tata y mi mama a zorg pa mi bay Hulanda y toch haya un estudio escolar pa deporte. Eynan m’a cuminsa busca ayudo psikiatrico y psicologico unda m’a bisa nan cu mi no kier pa nan yuda mi kita e voznan mas, esey no ta mi intencion mas. Nan si a scucha di mi, ayanan si tin instancianan cu ta yuda di otro manera y nan ta mir’e diferente. M’a haya algo cu mi por biba cune mas trankilo, mi no ta sinti negativo ni cu esey ta kibra mi. Desde cu mi a haya paz cu e scuchamento di voz y cu nan ta influencia mi caracter y mi manera di pensa y sinti, mi ta sinti mi contento. M’a caba di casa, mi tin un yiu homber di 12 aña y mi ta sinti feliz y trankilo.”