TA BASTA: ‘No por sigui permiti nos muchanan keda marca cu trauma pa bida’

Den cuadro cu caso sumario cu cantante Claudius Philips a lanta contra empresario Daury Rodriguez, pidiendo pa rectificacion riba acusacionnan haci riba medionan social, e grupo Ta Basta tambe a sa di reacciona riba esaki. Reportero di Bon Dia a acerca e grupo pa nan punto di bista riba esaki y algun otro puntonan relaciona cu e topico di abuso di menornan.

E grupo Ta Basta ta bisa cu nan a tende di hopi caso di un artista local cu lo a abusa di un of mas menor di edad. Hunto cu un abogado, un di e victimanan a logra entrega un keho oficial na JZP. Nan ta sigui na splica cu Ministerio Publico tin e caso bao investigacion, y Ta Basta ta hopi atento siguiendo esaki hopi di cerca. E discusion den comunidad e ultimo dianan aki, rond di e caso aki di sr. Philips ta e definicion di un Pedofil. “Pasobra e termino Pedofil ta ora un persona tin e sed sexual pa menornan di edad, o sea, mucha. Pero no ta actua riba dje. Un PedoSexual ta ora e persona ta satisface su sed sexual di menor di edad door di abusa di dje, tene relacion cu ne, of penetr’e cu dede mishi cu ne, etc,.’ e grupo ta expresa.

E caso sumario entre Claudius Philips contra Daury Rodriguez, na unda lo tin decision di hues riba sentencia pa 10 di Augustus 2022, ta trata di un rectificacion pa e uzo di e palabra Pedofil. Sr. Philips ta bisa cu esaki mester wordo rectifica pasobra e no ta un Pedofil, e ta bisa di nunca ta of a mishi cu mucha. Manera Bon Dia a skirbi den publicacion anterior, na sr. Philips su banda, ta haya cu e tambe merece e ‘fair chance’ pa sigui cu su bida despues di a paga pa su foutnan di pasado. E cantante ta bisa di no a comete ningun acto inmoral cu menor di edad, e ta para duro tras di esaki pasobra e sa e no a haci nada segun el a declara na media pafo di corte.

E grupo Ta Basta ta enfatisa cu si lesa e Uitspraak di 15-11-2011 di ‘Caso di pornografia di menor di edad den laptop’ unda cu hues mes a condena sr. Philips pa tin pornografia di menor di edad, e lo ta hopi interesante segun Ta Basta pa sa di cua angulo nan ta wak e caso aki awor.

Pa sigura cu ‘e abusador haya un veredicto digno di su abusonan,’ Ta Basta ta pidi otro victimanan pa tuma contacto cu nan si mester di ayudo cu un denuncia. “Si nos entrega mas denuncia hunto, nos ta forsa hues pa duna castigo mas severo basa riba mas evidencia,” e grupo ta subraya.