Ayera den oranan di atardi a keda presenta un proceso di cambio cu ta bay tuma luga pa maneho di desperdicio door di minister di Transporte, Integridad, Naturalesa y Asuntonan di Adulto Mayor, Ursell Arends. Den un conferencia di prensa el a sigura cu esaki ta cu e obhetivo di yega na un economia circular.

For di 22 di februari ultimo Arends a anuncia cu esaki lo tarda aproximadamente 10 aña y cu ayera a cuminsa. Serlimar, Ecotech, Directie Natuur en Milieu Aruba (DNM) y Bureau City Inspector (BCI) ta uni pa duna di conoce kico ta e proximo pasonan cu ta bay tuma pa loke ta trata maneho di desperdicio.

Na e momentonan aki, Aruba su economia ta lineal (Tuma – Traha – Usa – Benta Afo) pero e mester wordo restructura urgentemente. Pa e motibo ey nan a anuncia cu nan ta tumando e pasonan aki lo mas lihe posibel pa esaki sucede.

Loke nan ta trahando riba dje, segun Arends a splica, ta e prome paso pa restructura e maneho di desperdicio, loke ta encera reorganisa unda e desperdicio ta termina y con e ta wordo procesa. “Pa nos logra cera e dump na Parkietenbos, nos mester cuminsa na stop e fluho di desperdicio cu ta yega na dump”, el a sigura.

Pa candela no sigui tuma luga, el a enfatisa cu mester stop di fuel e candela tambe, loke ta nifica cu mester cuminsa elimina poco poco y gradualmente e cantidad di desperdicio cu ta yega na e dump, door di redirigi e desperdicio pa otro caminda pa e por wordo procesa na un manera responsabel. Unabes cu nan completa e etapa aki nan lo reorganisa e portfolio di desperdicio na uno cu ta enfoca riba un economia circular y desaroya un sector di desperdicio robusto y sostenibel. Manera el a expresa, ya caba sector priva a demostra di tin e capacidad y experticio riba e tereno di procesamento di desperdicio.

“Den un economia circular, desperdicio no ta existi, di manera cu nos ta anda cu desperdicio pa un manera cu ta recupera e material y e balor”, el a bisa.

Pa e motibo aki, nan a cuminsa cu e plataforma di ‘Trash 2 Cash’ pa asina “simbolisa” cu desperdicio tin un balor economico y tambe pa comunidad cuminsa cambia nan manera di pensa riba kico desperdicio ta nifica.

Arends a conta cu den e prome lunanan den su funcion como minister, nan a identifica varios tipo di desperdicio y e cantidad cu ta yegando na dump actualmente. Despues cu a papia cu diferente stakeholders, unda nan a wordo scucha, gobierno a compronde hopi mas di e industria aki. Nan a conclui cu localmente tin e experticio y tin e infrastructura necesario pa procesa tur tipo di desperdicio efectivamente.

Tambe el a bisa cu no tur tipo di proceso di desperdicio cu nan a haya ta perfecto, pero el a remarca cu cualkier metodo di procesamento di sushi cu no ta solamente pa benta esakiriba un landfill of kim’e den aire liber, ta un paso den e direccion corecto pa un maneho di desperdicio responsabel.

E meta – segun Arends a comenta – ta keda pa cera y paga e candela riba dump di Parkietenbos. “Esaki tambe lo yuda nos sigui stimula pa yega na e meta principal, e cual ta un economia circular, y nos ta haciendo esaki gradualmente y awe ta e dia di comienso di esaki”, el a expresa.

22 di augustus dump di Parkietenbos no ta bay acepta taira como desperdicio mas

Den e conferencia di prensa aki, tambe tabata presente Jermaro Emerencia ken ta fungi como PR di Serlimar. El a bisa cu riba 19 di augustus di 2020, Serlimar cu Ecotech Freezone a yega na un acuerdo cu un di e tipo di desperdicio, manera tairanan, eventualmente lo wordo procesa door di Ecotech. Ayera nan a tuma e decision hunto cu e minister cu entrante 22 di augustus 2022 nan no ta bay acepta taira mas riba dump di Parkietenbos.

El a expresa cu “a yega ora pa nos cuminsa ta mas sano den e manera con nos ta handle y procesa desperdicio”.

Eduard Jimenez, manager di operacion di Ecotech Freezone, a señala cu nan ta masha contento di por forma parti di e solucion pa e retonan cu Aruba tin den desperdicio, unda cu e compania cu e ta representa ta existi for di aña 1985. Na 2019 nan a crea Ecotech Freezone cu ta un planta di reciclahe profesional y unico den Caribe.

For di cinco aña caba nan ta encarga cu e proceso di gran parti di desperdicio di Aruba, tanto comercial y residencial, pero nan ta consciente cu ainda falta pa cera e dump y cu esaki ta e prome paso pa logra esey. Nan rol den esaki ta pa ricibi e tairanan y procesa nan, despues lo entrega esey na otro compania pa e caba cu e proceso. Nan tambe tin un acuerdo cu otro compania unda nan ta ricibi tairanan caba pa por sigui yuda Aruba yega na e siguiente nivel pa ta mas limpi y pa tin menos contaminacion.