(ElNacional) – Merca lo respeta e decision di e mandatario electo di Colombia, e izkierdista Gustavo Petro, pa restablece relacionnan cu Venezuela, e embahador di e pais na Bogota a bisa diahuebs.
Despues di asumi e presidencia dia 7 di augustus, Petro a anuncia cu el lo reactiva e vianan diplomatico y comercial cu Nicolas Maduro, kibra desde 2019.
Ni Merca, ni e administracion saliente di Ivan Duque ta reconoce Maduro como presidente door di considera cu su reeleccion tabata un fraude.
“Asina mes nos ta respeta decisionnan soberano di cualkier pais pa trata e situacion na Venezuela”, e representante encarga di e Cas Blanoco (White House), Francisco Palmieri, a bisa.
“Nos ta bay wak ki decisionnan e gobierno nobo lo tuma, pero e ta nan decision y nos lo haci tur cos posibel pa mantene e bon relacion cu Colombia”, e diplomatico a agrega.
Petro y Maduro ya a combersa telefonicamente despues di su eleccion dia 19 di juni como e prome mandatario izkierdista di Colombia.
E futuro gobernante ta spera hunto cu Maduro nan por desaloha e gruponan arma cu ta opera na ambos banda di e frontera di 2.200 kilometer.
E ta confia tambe cu el lo recupera e produccion di fertilizante di e empresa Venezolano, Monomeros, centro di e disputa entre Caracas y e lider opositor Juan Guaido, ken Merca ta reconoce como presidente interino.
Den e marco di e relacionnan nobo cu Washington, Petro ta propone modifica e Tratado di Comercio Liber vigente desde 2012 pa stop di importa algun producto, cu e meta di fortalece e produccion agricola interno.
Palmieri a comenta cu su pais kier traha cu e gobierno nobo, particularmente den nan esfuersonan di mehora e economia di e pais y promove mas igualdad economico.
