The STEM Embassy (TSE) ta un organisacion nobo lanta aña pasa den luna di augustus, y ta consisti di 7 studiante: 4 di Aruba y 3 di Corsou cu ta studiando na Hulanda, Merca y Suisa, kendenan tin e mesun mision: lanta curiosidad y confiansa pa STEM den un ambiente cu ta accesibel na un y tur na e islanan ABC. STEM ta para estudio den areanan di Science, Technology, Engineering y Mathematics (Ciencia, Tecnologia, Ingenieria y Matematica).

LeAnn Tromp, Educational Advisor & PR Manager di The STEM Embassy ta splica cu nan a cuminsa cu algun idea chikito, pa motibo cu nan a sinti falta di algun cos na Aruba. Ya cu hopi mucha no ta sigui un estudio den STEM, no gusta of no kier ni purba, TSE a dicidi cu ta e momento pa haci algo pa mas mucha na Aruba por sigui den STEM y bin back Aruba pa contribui na e lugarnan na Aruba cu mester hende cu estudio den STEM.

Rond mundo, y na Aruba tambe, mester di hende pa desaroyo di tecnologia. E necesidad pa

ingeniero ta birando mas grandi y e cantidad di hoben cu ta scoge pa studia den e areanan di STEM no ta creciendo suficiente.

P’esey TSE su obhetivo ta pa haci STEM mas accesibel y posibel pa esnan na Aruba, Boneiro y Corsou. Pa logra esaki The STEM Embassy ta organisando un STEM camp di dos dia, “Ki’ ta bo STEM?”. E camp aki ta pa muchanan entre 12 y 21 aña di edad y ta bay tuma lugar dianan 21 y 22 di juli na Universidad di Aruba.

Tromp a splica cu durante e camp e muchanan lo tin 8 diferente tayer incluyendo robotica, coding, tecnologia sostenible, biologia,charla di diversidad y mas. Tabatin un total di 100 luga disponibel pa e camp aki y segun Tromp ta indica,esakinan yena nan den apenas 10 dia.

“Nos nunca no a kere cu lo tin asina hopi interes den un evento asina, pues nos ta hopi contento di wak cuanto mucha ta interesa den e area nan aki. Esaki a motiva nos mas, pa sigui planea e eventonan ki den futuro na e otro islanan. Nos ta hopi emociona pa e evento aki y pa duna e muchanan di Aruba e oportunidad pa descubri kico precies STEM ta y kico tur nan por haci cu un estudio den STEM.”

Tromp a remarca cu e meta di e camp aki no ta pa tur mucha scoge pa sigui nan estudio den un di e areanan di STEM, pero mas bien pa nan conoce y siña kico STEM ta.

E camp aki ta bay termina diabierna 22 di juli cu e STEM Festival, cu ta bay tuma luga for di 7or pa 10or di anochi na Universidad di Aruba, unda tur e muchanan por invita nan famia y amigonan pa wak kico tur nan a traha durante e dos dia di camp. E muchanan ta bay tin nan mesun booth pa mustra kico nan a traha. Ta bay tin tambe diferente organisacion y compania di e area di STEM presente pa brinda informacion na comunidad riba kico STEM ta. Na e evento ta bay tin tambe un panel di discusion y premio pa e participantenan.

“Esaki ta pa e muchanan no bin djis dos dia, traha riba algo, bay cas y lubida kico nan a haci. E ta pa nan siña algo y nan echt por sigui” Tromp a agrega.

Manera menciona caba e camp ta pa mucha- y hobennan entre 12 y 21 aña di edad y no ta importa ki nivel di estudio e muchanan tin. Tromp a indica cu tin muchanan cu ta bay MAVO, muchanan cu ta bay Colegio, hobennan studiando na EPI, hobennan cu a caba di studia, entre otro. E nivel di estudio no ta importa ni tampoco e participantenan mester tin un conocemento previo specifico. Tromp a enfatisa cu e meta ta pa ta mas inclusivo posibel y crea interes den e areanan di estudio di STEM.

Por ultimo, The STEM Embassy a gradici nan sponsornan cu a haci e camp aki posibel a traves di donacionnan y a extende nan invitacion na henter pueblo di Aruba pa asisti na nan evento diabierna anochi. “Si bo ta interesa den STEM, wak kico tin na e isla, cera conoci cu nos, cera conoci cu e companianan, djis bin”.