Na principio di e luna aki Prome Minister, Minister di Asuntonan General, Innovacion, Organisacion Gubernamental, Infrastructura y Planificacion Teritorial, Evelyn Wever-Croes, a manda un circulario pa tur director y hefe di servicio, oficina y funcionarionan encarga cu administracion tocante rekisitonan adicional pa nombramento di director- of hefenan interino di departamentonan.
Den e circulario aki, Wever-Croes a toca algun punto cu a ser introduci como rekisitonan adicional ora ta trata di nombramento di un director of hefe di departamento interino. Prome punto menciona ta educacion y diferencia di salario. Na momento di nombra un director of hefe interino, prome mester realisa un buskeda interno critico di un candidato adecua.
E candidato mester ta suficientemente capacita of/y wordo capacita ariba e nivel y campo di actividad di e puesto den cuestion pa por observa tur e facetanan di e puesto aki. Mester examina si e candidato por eherce e posicion di manera sustantivo, pero tambe si e persona ey ta capaz di maneha eficientemente casonan critico y/of compleho. Por ehempel, un persona cu MAVO diploma no por actua manera director interino, cu ta rekeri un educacion universitario.
Pa e motibo aki, Wever-Croes ta splica den e circulario, no por tin mas di tres schaal di diferencia entre e salario di e hefe di servicio y e hefe interino previsto. Contrario, no por spera cu tin un observacion ariba gran escala. Por ehempel un hefe di departamento di un departamento central di servicio lo por ta un bon candidato pa actua como director interino.
E circulario ta señala tambe e tema di investigacion di seguridad. E hefenan di servicio y di cierto funcionnan ehecutivo crucial tambe mester ta exponi na un control di seguridad prome cu nan por wordo designa manera observadornan pa decreto nacional.
Otro posibilidadnan pa designacion di observadornan, den caso cu no por logra haya un candidato adecua internamente cu ta cumpli cu e rekisitonan aki, ta dividi den e siguiente dos opcion pa realisa e reemplaso temporal.
Uno: designa un empleado di gobierno di otro servicio cu mas experiencia y salario. Por ehempel, e por ta un hende cu den pasado a traha pa e servicio ey y cu tambe a ocupa e funcion ey, pero despues a wordo transferi pa otro departamento. Por supuesto e propuesta aki mester wordo consulta cu e hefe actual di e departamento y si no tin ningun obhecion na esaki.
Dos: si opcion uno no ta posibel den e caso di un funcion di hefe di departamento, por establece un ekipo di maneho entre cual ta reparti e responsabilidadnan di e hefe di departamento temporalmente entre dos of tres di su empleadonan. Durante e periodo di substitucion, e ekipo di maneho ta eherce hunto e funcion di hefe.
Den caso aki no ta rekeri un diferencia di tres schaal. Den e caso aki e recompensa lo tuma luga den forma di un bonus, ya cu no a trata di un observacion completo door di un solo persona.
Mester remarca cu pone un ekipo di maneho (management team) unda no tin suficiente capacidad y experiencia presente di un persona ta un opcion neutral ora ta trata di un situacion di ausencia di e director of hefe den situacionnan ‘neutral’. Sin embargo, hopi biaha e forma aki ta ser usa pa reemplasa un persona pa motibo politico.
Den e caso ey no semper ta percura pa e reemplasantenan tin e experiencia y training necesario, sino cu ta mas importante cu nan ta personanan di confiansa di e minister y/of gobierno. Lo ta interesante si algun dia tin un evaluacion di e diferente casonan di ekiponan di maneho pa wak si en realidad nan a funciona na un manera efectivo.
Den pasado tabata sucede regularmente cu tabata nombra reemplasante pa director of hefe cu no tabatin e conocemento of experiencia necesario pa asumi e tarea di dirigi un departamento den ausencia di e hefe mes. E exigencia cu e reemplasante no por tin un rango cu ta 3 schaal mas abao cu e hefe por preveni e problema parcialmente so. Si e hefe tin un rango halto manera por ehempel un schaal 15, e reemplazante lo mester tin 12, loke ta e rango normal pa esnan cu estudio universitario nivel Masters.
Den caso cu e hefe tin solamente schaal 14 of 13, e reemplasante por tin un schaal 11, cu ta e ‘eindschaal’ pa personal cu HBO of Bachelors. Schaal 10 no ta garantisa cu ta trata di un persona cu e educacion profesional necesario pa eherce e funcion como director/hefe interino.
Loke mester tuma na cuenta ta cu ta trata di reemplasa e hefe of director ora cu esaki ta ausente, e ora ey solamente e reemplasante ta actua como director. E medida tuma via e disposicion aki sin embargo no ta cubri e caso manera na Dimas, unda e reemplasante no ta un director interino, sino un director adhunto cu tin responsabilidad permanente na nivel di director adhudica na su persona.
Bon Dia Aruba a tuma contacto cu Sra. Kathy Ruiz-Paskel, director di Departamento di Integracion, Maneho y Admision di Stranhero (DIMAS) y a puntra con e situacion a keda despues cu Ruiz-Paskel a gana su caso den corta y hues a dicidi cu e mester a haya tur su responsabilidadnan back.
Segun Ruiz-Paskel a indica den su contesta, cu actualmente no tin ningun hende oficialmente nombra, pa medio di un decreto gubernamental, den e posicion di director adhunto (Adjunct Directeur) na DIMAS.
