Durante un conferencia di prensa extraordinario, ayera merdia minister di Finanzas y Cultura, Xiomara Maduro, den compania di otro ministernan di Gabinete Wever-Croes II a informa comunidad cu Gobierno di Aruba ta bay paga 5% di e recorte di salario di empleadonan publico, aunke Hulanda no ta di acuerdo.

Manera ta conoci, ayera promer minister Evelyn Wever-Croes tabata na Hulanda den un reunion cu Secretario di Estado pa Relacionnan di Reino, Alexandra van Huffelen unda nan a papia di e punto aki. Na momento cu e reunion a finalisa, promer minister a tuma contacto cu Conseho di Minister pa asina tuma e decision di bay over na paga e empleadonan publico e 5% di recorte di salario, di e 12.6% total.

Esey ta nifica cu den e dianan aki, empleadonan publico y tambe empleadonan di fundacionnan ta bay haya e 5% back, dependiendo di e fundacion mes.

Minister Maduro a splica cu tin un diferencia di opinion entre Hulanda cu Aruba riba e punto aki, unda cu Gobierno di Aruba ta di opinion cu nan ta cumpli cu loke ta e exigencianan cu a wordo poni pa Conseho di Minister di Reino, cu ta tres condicion y asina Aruba por bay back pa paga 5% y eventualmente paga 100% di e salario di empleadonan publico.

E pago di 5% ta presupuesta den presupuesto 2022, minister Maduro a comenta cu akinan nan a mustra CAft tambe con nan ta bay cubri esey y den opinion di gobierno, esaki ta cubri.

Tambe nan a presenta na Parlamento e proyecto di ley Landsverordening Normering Topinkomens (LNT) conforme e palabracionnan cu Hulanda. Politiconan a mantene locual ta e recorte di 25% riba nan salario, e cual tambe ta un condicion. Ademas, Maduro a trece dilanti cu hopi biaha den discusionnan publico ta bisa cu e politiconan no a recorta nan salario, pero “esey no ta berdad”.

Banda di esey, Parlamento di Aruba den cuadro di nan autoridad a entrega un amienda di e ley LNT y ta basa, segun Maduro a menciona, riba dos punto: e prome punto ta e periodo caminda cu por reduci e salarionan di esnan cu ta gana mas di e Wever-Croes Norm y a bira cinco aña en bes di dos, conforme e consehonan di Raad van Advies y tambe e comision di Corporate Governance local.

“Esaki ta un cambio cu ta wordo haci conforme locual ta e adviesnan cu tin riba e topico akinan”, minister Maduro a bisa.

Pa loke ta trata e di dos punto cu parlamento a haci cambio, ta trata di e suma di 130% mas cu e salario di promer minister, cu a keda adapta di 261.000 – un suma cu ta basa su mes riba salario di promer minister reduci cu e 25% – pa 329.000, cual ta e suma sin e recorte di 25%.

Den esaki, minister Maduro a splica cu e 5% mescos cu 25% cu ta conta pa e politiconan ta cosnan cu mester tabata den un momento transitorio. “No ta intencion pa esaki keda pa semper.” P’esey tambe nan ta bay cuminsa paga e 5% unda cu den e proximo presupuesto lo tin e resto di 12.6%, pa motibo cu Aruba como pais tin cu bay back na normalidad. P’esey tambe el a bisa cu Parlamento a haci cambio na un manera husto, debi cu tin cu tuma for di e punto di bista di e normalidad pa asina por haci cambionan husto.

Parlamento a splica caba e dos cambio aki. “Di nos banda mi tin cu bisa cu den opinion di gobierno e cambionan aki no ta mishi cu e principio di ley, pasobra esey ta locual ta importante. Es decir cu akinan ta wak cu tin regla, e ley a pasa y aworaki no por tin e abusonan di awo bay dilanti ”, el a bisa.

Esey ta e motibo di pakico a bin cu e ley aki pa regula, pa asina ey no conta cu salarionan hopi halto na Aruba.

Ademas, Maduro a señala cu Gobierno di Aruba tin cu respeta e derecho constitucional di parlamento pa trece cambio den e leynan, esaki ta e mesun derecho cu ta conta tambe pa otro partinan den reino. Mescos cu Tweede Kamer na Hulanda tin derechonan pa trece amienda, aki na Aruba tambe Parlamento di Aruba tin derecho pa por trece su amienda.

“Nos como gobierno, y mi ta kere cu nos politico y ningun otro minister, tampoco Secretario di Estado, ta para riba locual ta e derecho constitucional di nos pais pa por haci e cambionan”, minister Maduro a expresa.

Tambe el a sigura cu Aruba no por cumpli cu e condicionnan di Hulanda pa exigi of bay Parlamento y pidi pa elimina locual a cambia caba y a pone como amienda. E ley aki a wordo pasa, unda cu Gobernador a firma e ley aki caba. “P’esey bo no por bay, si bo ta respeta e derecho di Parlamento, y mi ta kere cu esey nos tur kier, ora cu bo ta den un democracia bo tin cu respeta e derecho di Parlamento”.

For di mei 2020, aparato gubernamental, semi-gubernamental y fundacionnan tabata solidario y nan a haci e sacrificio pa e recorte en cuestion. “Gobierno ta haci tur locual ta na su alcance pa asina por haci e pagonan aki back, y p’esey tambe nos a hink’e den presupuesto di e aña akinan. Considerando cu den bista di gobierno, e ley manera cu el a wordo presenta y tambe e amienda ta carga e principio di e ley, y na Aruba mirando e hecho cu ta menos cu shete persona ta gana un suma cu ta mas halto, nan ta haya cinco aña pa por haci e adaptacion aki…”, el a bisa.

Ademas, el a señala cu promer minister a informa Hulanda di e desaroyo aki, pero Hulanda no ta comparti e mesun opinion cu Gobierno di Aruba y ta keda insisti cu mester cambia ley na Parlamento. Gobierno ta di opinion cu esaki ta contra principionan democratico di un pais unda cu despues di analisa tur esaki nan a tuma e decision finalmente di paga e 5% back.