(NLTimes) – E lo tuma algun siman mas prome cu servicio di salud GGD por cuminsa cu vacuna preventivo den contra di e virus Monkeypox, Henry de Vries, un profesor di infeccion di piel cu ta traha pa GGD Amsterdam-Amstelland a comenta na Eenvandaag.
No tin suficiente vacuna pa tur hende cu kier uno, cual ta nifica cu GGD mester selecta cautelosamente ken ta den e riesgo mas grandi, el a bisa.
“Mi ta compronde cu hendenan kier un vacuna contra di Monkeypox lo mas pronto posibel, pero duna nos tempo. Nos tin cu haci esaki cautelosamente,” de Vries a bisa. E ta tuma tempo pa prepara un ronda di vacunacion segun de Vries. “Nos solamente tin 1 siman y mey ta traha riba esaki.” Preparacion pa e vacuna di coronavirus a tuma 4 luna. “Mi no ta kere cu e lo tuma asina hopi tempo, pero conta cu algun siman si prome cu nos por cuminsa cu vacunacion.”
Un motibo pa esaki ta e cantidad limita di vacunanan disponibel. “Nos no tin un suministro infinito. Nos tin 70,000 vacuna pero tur hende mester ricibi dos. Cual ta nifica cu nos por vacuna mas o menos solamente 35,000 persona. Esaki no ta suficiente pa tur e persona cu kier uno, cual ta nifica cu nos mester haci e seleccion di ken lo ricibi e vacuna aki nos mes,” de Vries a splica.
“Y pa motibo cu nos tin asina tiki vacuna, e ta esencial pa nos vacuna e grupo corecto awo. Bo kier vacuna e personanan cu tin e chens mas grandi di ser infecta cu e virus,” el a continua. “Inyeccionnan ya caba ta tumando luga, specialmente pa personanan cu tabata den contacto cu un pashent di Monkeypox.”
Riba diamars, instituto di salud publico Hulandes RIVM a anuncia cu tin 656 caso confirma di Monkeypox na Hulanda. E virus ta plama via di contacto di piel. Usualmente e personanan infecta no sa bira hopi malo di e virus. Esaki pro causa sintoma manera keintura, dolor di curpa, y malestar general. Algun picason y blaar lo por sali riba e curpa algun dia despues di e infeccion.
