Ayera den oranan di mainta, partido RED Democratico a duna un conferencia di prensa pa asina un biaha mas trece dilanti na comunidad nan pensamento, esta cu “algun politico y mandatarionan na Aruba ta gaña”, segun Ricardo Croes a cuminsa señala den e conferencia aki.

Ademas, el a bisa cu Aruba na e momentonan aki tin problemanan grandi como costo di bida cu ta aumenta, na unda cu el a conta cu tin scarsedad di berdura y productonan cu tambe na nivel mundial ta pronostica cu ta bay sigui aumenta.

El a recorda cu na aña 2020 ora su persona tabata den parlamento, el a pidi na Gobierno di Aruba pa inverti den sector primario, pero “ni awor, cu no solamente agricultornan sino normalmente personanan cu no tabata planta na cas awor nan ta planta, a mira e necesidad cu no tin nada den agricultura”, el a bisa.

Igualmente, el a sigura cu den parlamento e coalicion di aworaki conforma pa partido MEP y RAIZ “a manda un fast ball dal Corsou y dal Sint Maarten y for di Hulanda, den e rijksministerraad a bin e decision cu minister presidente no por kita ni 1% pa e duna back na trahadonan”, Croes a declara.

El a mustra preocupa pa e votadonan cu ta pone nan voto pa partidonan grandi, cu ta AVP y MEP, cu den su opinion “a bin pa a masacra e pais aki, pasobra esey pueblo a haci den eleccionnan di aña pasa tambe”, el a bisa.

Di mesun manera, el a declara cu partido MEP no a bin cu un pilar economico nobo of un entrada extra,“e mesun turismo y mesun energia di petroleo, nada otro”.

“Nos mester haci un cambio y e cambio ta vota consciente, e cambio ta pone un presion de facto riba gobierno pa nan haci locual pueblo mester” el a sigura.

El a aplaudi e decision di chauffeurnan di bus cu a tuma e curashi di manifesta, pero cu lastimamente nan so a presenta. Den su opinion, taxista, compania di transporte y tur ciudadano tambe mester a uni na e manifestacion ey pa motibo cu hende ta preocupa cu nan entrada no ta yega.

“Dicon gobierno no ta realisa cu Aruba mester un pandemia di su mes, den sentido di realisa cu no mester di biaha pa bay atende un reunion di un ora cu un full un delegacion di cinco hende den first class manera minister di Enseñansa a haci?” el a puntra.

Pa via di pandemia, rond di mundo reunion virtual a bay on y hopi a siña cu e ta mas barata, cu por spaar tempo, riesgo, placa unda cu el a pidi pueblo di Aruba pa habri su wowonan, cu e sa cu pueblo ta bayendo atras, comerciantenan ta bayendo atras.

“Mi decepcion ta grandi, pero mi no ta e unico persona desapunta, mi ta cana den pueblo cu ta desapunta cu locual ta pasando” Croes a bisa.

Pa finalisa, Croes a reitera cu e ta dunando e conferencia di prensa aki pa motibo cu su persona no ta retirando for di politica y cu tampoco ta nifica cu tur cos ta posibel. El a afirma si cu si ta berdad cu na e momentonan aki partido RED Democratico ta bayendo pa un campaña electoral di manera sigur.

Di su parti, Armando ‘Rudy’ Lampe a trece dilanti cu den un otro corant local a sali un articulo unda promer minister Evelyn Wever-Croes a sigura “cu egoismo di dos partido RED y POR na final a caba cu e gobernacion anterior y aworaki e gobernacion di partidonan MEP y Raiz ta bay den harmonia.” Lampe a menciona cu di un banda promer minister tin rason. “Nos tabata cuater aña den conflicto cu MEP, pakico? Pasobra nos ta bringa egoismo di partido MEP y nos tabata sali na defensa di interes general”.

Pa via di esey, segun Lampe a expresa, a bin dilanti cierto incidente entre promer minister y Lampe como ex-minister di Enseñansa, unda el a sigura cu prome minister a tuma decisionnan sin cu e tabata fungi como minister di Enseñansa. Por ehemplo, el a papia di e fussering cu SIMAR y asina mes “el a tuma un decision pa Enseñansa contra ley”.

El a splica cu den e cuater aña cu nan tabata forma parti di gobierno como coalicion, nan a haya situacionnan asina di conflicto cu promer minister.

Di loke ta trata e anuncio di e logro “historico” di Lotto pa Deporte, Lampe a expresa cu nan ta para cu si e placa ta pa deporte nan ta sostene esey, pero “ta depende di e hendenan cu ta bay ehecuta un acuerdo”. Di 2008 pa 2009 rapport di Ernst & Young – cu segun el a manifesta ta publico – ta indica cu Endy Croes a paga cinco miyon florin na su ruman “cu no a bay na deporte, a bay pa su ruman” y cu den mesun rapport ta menciona cu den e periodo ey, 10 hende a wordo tuma den dienst sin vacatura.

“Boso sa ki ta bay pasa ki si ta bin mas placa? Boso ta kere cu e placa ta bay pa deporte? E placa ta bay pa family and friends”, Lampe a sigura.

Igualmente el a conta cu loke nan a logra ta e parti operacional ta bin back pa Aruba, loke ta nifica mas personal, mas promocion y mas placa.

Den su opinion, el a menciona cu partido RED a cuminsa cu un scol di agricultura unda nan no a haci mucho promocion na Scol pa Ofishi (SPO) cu un diploma.

Tocante werksternan di SKOA, Lampe a señala cu aworaki sindicato SEPPA ta bay hiba SKOA na Corte pa motibo cu finalmente, SKOA a comunica nan den un reunion cu nan tin cu cumpli cu ley y mester paga e werksternan conforme ley.

Ademas, el a declara cu henter pueblo por mira den e desaroyo aki cu realmente ken ta para pa berdad unda cu for di comienso partido RED a bisa cu SKOA mester cumpli cu ley “nan a hunga politiek cune y hunga cu sentimentonan di werksternan y gaña nan, aworaki e berdad ta sali na cla”, el bisa.