Den luna di juli Bureau City Inspector (BCI) hunto cu Cuerpo Policial di Aruba a cuminsa cu nan accion di limpiesa pa loke ta trata autonan staciona y/of bandona riba camindanan publico. Vocero di BCI, Sr. Robby Rossel, a splica con e prome simannan di e accion aki a bay y kico ta e siguiente pasonan pa cu e accion aki.
Rossel a splica cu BCI cu durante e prome siman di accion di limpieza BCI hunto cu Cuerpo Policial a deshaci di e autonan cu ta riba camindanan publico, autonan cu ta para ariba acera y di artefactonan riba camindanan publico den barionan di San Nicolas. Tambe BCI a tene accion ariba e parti di limpiesa di stupinan door di sushedad cu hopi hende ta tira.
E accion aki a cuminsa dia cuater di juli y segun Rossel ta indica esaki lo continua y lo dura por lo menos dos pa tres luna mas. Tur dia BCI y Cuerpo Policial ta sali pa realisa e accion aki mirando cu tin hopi necesidad pa esaki pa motibo di sushedad y autonan daña cu ta riba camindanan publico, tur esakinan ta na gran cantidad.
Pa loke ta e accion den San Nicolas Rossel a comenta cu nan a registra un total di 71 auto y di esakinan 40 auto a wordo kita. Takelwagen ta transporta e autonan aki y otro nan cu ta wordo hiba warda di Balashi. Autonan cu ta den bon condicion y cu personanan no kier BCI kita e auto, tanto Cuerpo Policial como tambe e inspectornan ta reparti boet y e auto lo wordo transporta directamente pa Balashi pa asina esaki keda eynan te ora nan tin nan papelnan na ordo, cual ta seguro y number di auto.
Ainda tin 31 auto cu mester wordo kita pa cera e total di 71 cu BCI tin registra y Rossel a agrega cu nan ta ricibiendo yamadanan indicando unda tin autonan cu mester wordo kita den San Nicolas.
Rossel a sigui splica cu e siman aki e accion lo ta concentra den e area di Savaneta te na e area di Pos Chikito y el a remarca cu ya caba nan cuminsa haya yamadanan. “Si cualkier persona kier yama pa kita e autonan aki of elimina nan for di riba caminda por yama libremente na 582-9777 y asina tambe bo ta coopera cu nos pa tene Aruba limpi”, Rossel a indica.
Durante e accionnan aki e boetnan ta wordo reparti tanto pa e inspectornan di BCI y tambe agentenan di Cuerpo Policial. “Nos ta sumamente contento di por a traha conhuntamente cu Cuerpo Policial caminda nos a cera un ekipo di BCI cu Cuerpo Policial, nos a drenta den cada bario di e poblacion di San Nicolas y eynan nos a papia cu e hendenan y hopi di nan tabata di acuerdo cu nan no mester e auto y por wordo elimina”, el a agrega.
Rossel ta remarca cu tin autonan bandona of staciona ariba camindanan publico ta algo cu ta contra ley. El a splica cu si e persona tin su auto den su tereno di cas, BCI ni Cuerpo Policial no por impone nada riba dje, pero no por pone e autonan aki riba camindanan publico.
El a indica cu entre otro den Zeewijk nan a haya garagenan cu ta drecha auto y nan a encontra un total di cuater pa cinco garage ilegal den San Nicolas y nan a encontra alrededor di seis cu tin nan papelnan den ordo, pero toch nan tin autonan bieu sin motor, otro nan sin wiel sin nada riba camindanan publico y BCI a elimina nan.
Aworaki e accion ta bay cuminsa na Savaneta y tin varios container y autonan di transporta carga cu ta para riba camindanan publico. Tur esakinan, Rossel ta menciona, nan a papia cu e personanan responsabel caba y nan tin cu cuminsa prepara pa kita esakinan pasobra accion lo cuminsa y si no BCI lo elimina nan.
Rossel a subraya cu e gastonan pa transporta e auto ta cay riba e doño di e vehiculo mes ya cu e auto tin cu wordo transporta pa Balashi y mirando e auto no ta un auto cu ta wordo benta afo pa hero bieu, e ta un auto cu tin añas para cu no tin su number di auto y no tin su seguro.
“Nos ta haci un yamada aworaki na comunidad di Aruba, no lubida cu e accionnan aki ta continua, ya caba nos a drenta Savaneta asina ta cuminsa kita bo autonan for di camindanan publico pa bo por evita e boetnan aki y perde bo auto. Hinca bo auto den bo cura si bo tin un cura y bo mester di e auto. Ban stop tambe di cumpra autonan bieu pa pone para dilanti di bo cas pasobra esaki Cuerpo Policial y BCI lo elimina pasobra tin un ley”, Rossel a enfatisa.
Pa loke ta tema di maltratao di cacho y ley di cacho, Rossel a indica cu hopi hende no ta compronde cu e ley di cacho ta cay bao di BCI. El a splica cu na momento cu un persona tin un cacho, e ta doño di e cacho y ta responsabel pa e bestia y mester cuid’e segun e ley di cacho ta indica. El a menciona tambe cu tin hopi hende ta yama bisa cu e cacho ta yega nan cas, pero nan tin duele di dje y ta dun’e cuminda, Rossel ta indica cu si un persona duna un cacho di caya cuminda, automaticamente e cacho ta bira di e persona.
El a comenta cu BCI tin hopi trabao cu e tema di cachonan riba caya y tin hopi maltrato di cacho tambe cu nan ta ricibi. El a splica cu siman pasa na Tanki Leendert nan a encontra un caso na unda un cacho a wordo mara den un mondi bao di un palo sin awa, sin cuminda y e cacho tabata completamente deshidrata. BCI a tuma e cacho hib’e pa e haya su tratamento medico pa recuperacion y asina un otro persona por adopt’e.
El a resalta cu BCI lo continua cu investigacion den e bario pa purba yega na ken ta e doño di e cacho aki y automaticamente el lo ricibi un boet pa esaki.
