Studia cu dedicacion y perseverancia awe y bo lo cosecha bon resultado mañan; Leanne Figuereo, un hoben cu a demostra cu si bo kere y lucha, bo por logra tur cos

Un hoben di 17 aña, cu un disciplina extraordinario y confiansa den su mes cu a traha sumamente duro pa logra su metanan, awe ta cosechando e miho resultadonan, como no solamente e miho graduado di su scol, sino tambe di henter e isla di Aruba.

Leanne Figuereo ta di un famia unda cu for di chikito, semper nan a ser conscientisa riba e importancia di un estudio. Su mayornan Rafael y Josefina semper a percura pa su persona y su dos rumannan, semper tene den mente cu e sacrificio di studia awe, lo trece frutonan grandi den futuro, y esaki ta exactamente loke Leanne a aplica den su bida.

Desde MAVO e tabata un bon studiante, cu tabata responsabel y disciplina pa semper traha su huiswerknan y studia na tempo pa su examennan, sinembargo, ora cu a yega e momento di pasa di MAVO pa HAVO, e diferencia tabata por a ser sinti. E tabata sa cu e caminda cu e tin su dilanti, lo ta uno diferente. “Mi ta kere hopi hende por tambe bisa cu nan a yega di scucha ‘colegio no ta facil’ of ‘colegio ta hopi trabao’, kiermen ya for di e momento aki caba mi tabatin den mi mente cu e lo ta un scol mas halto, mas dificil y cu lo ta hopi mas trabao, cual a forma e expectativa cu mi tabatin ora di cuminsa colegio,” Leanne a conta.

Hopi biaha studiantenan por sinti presion y te hasta stress, ora di cambia for di un nivel pa otro, y esaki por causa confusion y bira un obstaculo pa hopi di e studiantenan aki pero di otro banda, tin studiantenan cu no ta consciente ni tuma na cuenta e cambio di nivel cu lo tuma luga na momento cu nan cuminsa un scol di otro nivel. E mensahe y comentarionan cu nos ta expresa tocante e scolnan aki y cambionan aki hopi biaha ta causa un impacto den nos muchanan ora di cuminsa un scol nobo.

Sinembargo, e ta keda na nos pa yuda nos muchanan prepara nan mes mentalmente y ta bon informa ademas di consciente di e cambio cu lo tuma luga den nan bida. Cu e sosten y consehonan continuo di su mayornan, Leanne tabata consciente di e caminda su dilanti, y a crea e meta di logra yega na e fin di e caminda sin importa con duro esaki por ta.

“Mi a premira cu e lo ta algo hopi mas dificil, y e tabata asina. Compara cu MAVO, nos tabatin mas huiswerk, cosnan a bira mas dificil, si bo no let op den les bo ta keda atras di biaha, etc. kiermen, mi mester a adapta y siña con pa parti mi tempo liber pa asina por cumpli cu tur mi tareanan y tin suficiente energia ora di bay scol pa mi por ta presente den klas tanto fisicamente y mentalmente,” el a comenta.

Un di e cambionan mas grandi cu studiantenan por sinti ora di pasa di MAVO pa HAVO ta e nivel den e materianan. Hopi biaha den MAVO, tin e custumber y e suerte di por studia dianan prome cu e examen, y tog haya bon resultado sinembargo esaki no ta e caso na HAVO, contrario na loke algun por pensa. “E nivel di e materianan ta mas dificil, y bo no por keda sin studia y toch haya bon punto. E lesnan ta bay hopi mas lihe, cual ta haci cu ademas di traha huiswerk na cas e ta sumamente importante pa let op den klas, pasobra bo no ta keda hopi tempo riba e mesun tema mas,” Leanne a splica.

Ademas di e nivel di e materianan, e cantidad di trabao tambe ta aumenta. Aunke bo ta haya e mesun 7 materia, e cantidad di trabao cu mester haci pa cada un di e materianan ta aumenta, “ya mi no tabata por leer pa un materia alabes, mi mester a siña con pa parti mi tempo y siña pa varios materia na mesun tempo, y haci mi best pa cada un di nan.”

Pa por sobrepasa e obstaculo aki, el a traha un schedule di cuanto tempo e lo inverti den cada materia y cuanto tempo e lo inverti den relaha y sosega, cual tambe tabata un parti importante. Cu hopi disciplina el a cumpli cu su schedule tur dia, generando cada biaha miho resultado pa su examennan.

“Un motivacion pa mi persona tabata e logro di por caba colegio. Tambe mi mayornan a motivami semper, pa haci mi miho esfuerso paso semper nan a kere den mi y tabata cordami cada biaha cu apesar di tur obstaculo, mi por logr’e,” el a expresa.

Danki na e sosten y motivacion incondicional di su mayornan, y pa medio di semper kere den su mes y lucha pa sobrepasa tur obstaculo manteniendo su mes enfoca riba tur su metanan, Leanne a haya e miho resultadonan cu e lo por a logra; El a gradua como Beste Geslaagde di su scol, Colegio Nigel Matthews, ademas di a gradua como e Beste Geslaagde van Aruba.

“E tabata algo cu mi no a spera. Semper mi a studia y haci mi best sin ningun expectativa y e tabata un sorpresa ora cu mi a haya sa cu mi ta beste geslaagde di mi scol, y despues di Aruba. Mi ta hopi contento cu mi gran esfuerso a bal la pena y cu mi a logra mi meta. Mi ta conseha tur hoben, semper haci bo best y semper cuminsa leer na tempo. Semper corda cu sin importa kico pasa, si bo haci bo best, e ta mas cu suficiente pa bo sinti bo mes orguyoso di bo mes.”