Chauffeurnan di autobus ta bati alarma na gobierno pa aumenta tarifa inmediatamente; Ta spera contesta no mas tarda cu Dialuna pa 12’or di merdia

Diabierna mainta, chauffeurnan di autobus a bini hunto y topa na parkinglot di Linear Park pa marcha hunto, dirigi pa polis, direccion di Bestuurskantoor pa entrega un carta. E ‘Grupo di Autobus Uni’ ta haci un peticion na gobierno pa haci un aumento di 1 florin riba e tarifa di autobus, pasobra nan gastonan a cuminsa bira demasiado halto pa por sigui maneha.

Algun siman atras Bon Dia a publica tocante e tema aki na unda a combersa cu algun chauffeur di autobus despues di un bishita di parlamentario Mike Eman. E parlamentario a bin cu un proposicion pa presenta na gobierno pa cu un prijs preferencial pa esnan den transporte publico den cuadro cu aumento di prijs di gasolin y diesel. E chauffeurnan a uni diabierna mainta y bini cu un carta na unda a trece dilanti e propuesta pa aumenta e tarifa pa autobus cu 1 florin inmediatamente.

Den e carta nan ta trece pa dilanti cu nan ta na altura di e estudio conduci door di Universidad di Aruba cu gobierno a laga haci tocante e relacion entre aumento di tarifa di combustibel y ahustacion di tarifa di autobus. E estudio aki lo termina na September 2022 pero e chauffeurnan no por warda asina largo. “Nos lo ta morto pa e tempo ey caba,” un di e chauffeurnan ta expresa na Minister di Transporte, Integridad, Naturalesa y Asuntonan di Adulto Mayor, Ursell Arends, hunto cu Minister di Asuntonan Economico, Geoffrey Wever, kende a ricibi e chauffeurnan na Bestuurskantoor diabierna mainta.

E tarifa di 3 florin no ta sostenibel mas pa e chauffeurnan di autobus, mirando e aumento di tarifa di combustibel como tambe otro factornan cual ta sigui subi, por ehempel e seguro di autobus.

Minister Arends a bisa cu ta sostene e aumento di prijs, pero mester tene na cuenta cu lo bin otro grupo despues y bisa pa aumenta nan prijs tambe, manera pa Taxi. “Mi ta spera e proposicion cu boso trece ta algo structural tambe cu nos considera y analisa. Mi tin comprension pa esaki pasobra boso costo di haci negoshi tambe ta subi drasticamente, nos lo analisa esaki y boso por ta sigur cu lo contesta boso den un tempo defini,” segun e mandatario a declara pafo di Bestuurskantoor na e chauffeurnan diabierna mainta.