(Infobae) – Despues di lunanan di proceso y debate, Parlamento Chileno a aproba e aplicacion di test di droga na cierto diputadonan den ehercicio. E resultadonan di e test ta bay ta publico y e metodo di aplicacion di e test lo ta un analisis di cabey.
Pa parlamento Chileno, esaki ta cu e meta di aumenta standard di transparencia di e diputadonan, ademas di evita cu nan ta comete delitonan vincula cu narcotrafico.
E reglamento parlamentario aproba ta establece cu e realisacion di e pruebanan aki lo ta di caracter publico, mester protege e dignidad di e diputadonan y lo garantisa e imparcialidad di e analisis. E prome control ta bay wordo aplica prome cu dia 30 di juni di cada aña, mientras cu e otro ta bay ta prome cu 31 di december.
Segun e diputado di partido Union Democrata Independiente (UDI), Juan Antonio Coloma, e test di orina a keda descarta y a wordo cambia pa analisis di cabey. Tur esaki pa “garantisa na personanan cu ta bay check tur e droganan posibel na momento di realisacion di e test”.
Diputada Pamela Jiles a sostene cu e aprobacion di e reglamento aki “lo tin hende cu lo core bay corta nan cabey awor, tin personanan cu no kier pa haci un narco-test y ta bon pa puntra pakico nan ta nenga di haci esey”.
Tambe a ser aproba pa diputadonan inclui un autorisacion di eliminacion di secreto bancario, tur esaki pa kita e dudanan si un diputado tin of no vinculonan cu narcotrafico.
Finalmente, e diputadonan tin 30 dia for di aprobacion di e proyecto aki pa realisa un control di droga. “Tur diputado den ehercicio lo mester somete na un control di droga den e un periodo di 30 dia for di e fecha di aprobacion di e reglamento aki” e iniciativa parlamentario a señala.
