“No por sigui depende riba prijs di petroleo internacional mas”

Ayera mainta, durante un conferencia di prensa di minister di Asuntonan Economico, Comunicacion y Desaroyo Sostenibel, Geoffrey Wever a bin dilanti informacion tocante aumento di prijs di gasolin. Tambe tocante e topico cu tabata den discusion pa algun dia caba den comunidad, tocante decision di gasolin stations pa no acepta carchi di debit/credit.

Manera Bon Dia Aruba a publica den su edicion di ayera diaranson, e prijs di gasolin a aumenta cu 4.5% loke ta representa 3,35 cen y prijs di diesel a subi cu 7.7% loke ta nifica 3,12 cen pa cada liter. Minister Wever a bin splicando for di lunanan atras con e formula aki ta traha y cu esaki no ta un medida di parti di gobierno pa aumenta su entrada.

“Esaki ta basa riba e prijs internacional di mercado, nos ta monitor basa riba e luna anterior.” Den e caso aki, e luna di juni ta coy un averahe segun e U.S. Gulf Coast y esey ta bira e ora e suma basa riba e cual ta calcula e prijs di gasolin y diesel cu su structura, den esaki tin e accijns, BBO, BAZV y BAVP y tambe e margen cu FEMSA ta cobra pa entrega gasolin na e gasolin stations, y tambe tin e margen cu e gasolin stations tin mag di cobra na e consumidor cu nan ganashi, cu ta 14.5cen pa cada liter cu nan ta bende.

Segun Wever a enfatisa, no ta un decision di gobierno sino basa riba e desaroyonan internacional “cu lamentablemente nos no tin influencia riba dje den e momento aki”, el a sigura.

Den su opinion, e parti positivo ta cu desde siman pasa e prijs pa bari di petroleo a baha bao di 100 dollar y esey ta nifica cu si e tendencia aki continua, pa e luna di augustus lo mira un rebaha den e prijs di gasolin y diesel.

“Esaki ta un desaroyo positivo cu nos spera cu e ora ey e consumidor tambe lo ripara esey den e reduccion di prijs di gasolin y diesel”, minister Wever a bisa.

Comentando riba e topico di e disputa entre Aruba Gas Dealers Association (AGDA) y banconan comercial local, minister Wever a trece dilanti cu pa basta tempo caba tin un dialogo andando, caminda cu e banconan a informa e gasolin stations cu e transaction fees – esta e tarifa cu banco ta cobra pa transaccion riba mashin (POS terminal) – no tabata wordo cobra na e gasolin stations, y ta pensa cu ta momento cu banconan no por sigui absorba e fees aki y a dicidi cu ta bay cobra e fees na e gasolin stations.

“Esaki tin un impacto directo riba entrada di gasolin stations cu ta basta pisa y esey a hiba cu gasolin stations a tuma e decision di no acepta tarheta mas, sino solamente cash. Esey naturalmente ta un desaroyo cu ta preocupante den varios aspecto”, el a sigura.

Un di nan ta e parti di seguridad, modernisacion di nos pais, labamento di placa y turismo. Ora ta bay na un ‘Cash Based Economy’, minister Wever a informa cu ta kere cu ta importante pa tin un bon control y pa e motibo ey, su persona encarga den area di economia a dicidi di interveni. El a reuni cu asociacion di bankeronan di Aruba y tambe cu gasolin stations. “Ambos tabata dispuesto pa di biaha sinta y scucha pa asina cada un a contribui na un dialogo positivo y demostra nan punto.”

Cu cada organisacion gobierno tin un comprension, segun e minister a declara, y na momento cu gasolin stations di cada 100 florin, nan ta resta 4,51 cen, e resto ta placa cu ta paga back na gobierno den accijns cu BBO, e margen cu nan ta resta ta un margen hopi limita.

El a menciona cu riba cada liter di gasolin cu gasolin stations ta bende pa publico, ta gana 14.5 cen. “Esey ta un maximo cu gobierno ta impone y gobierno ta establece, nan no tin e espacio manera otro comerciantenan pa hisa nan prijs ora cu nan prijs ta subi. Esey ta nifica cu cada aumento externo nan mester absorba esaki directamente”, el a bisa.

Den e caso aki, e transaction fees ta 75 cen riba cada 100 y esey ta nifica cu si tin un entrada di 4,51 cen pa cada 100 florin cu ta bende y tin cu entrega 75cen “esaki ta un impacto grandi”.

Ta p’esey cu el a señala cu tin comprension cu e gasolin stations y na mesun momento cu e banconan. Aworaki el a puntra na Asociacion di Bankeronan ta pa duna gobierno tres luna di tempo, pa nan suspende nan decision pa cobra e fees y asina duna espacio na gobierno pa sinta na mesa cu tur banda pa wak ki otro alternativa tin pa por yega hunto y tuma tempo pa prepara un plan alternativo.

Pa e motibo ey, Aruba Bank Asociation a honra e peticion ey te cu 1 di october, manera a keda conoci diamars ultimo, pa purba di busca un solucion na e problema aki. E ta un situacion complica y e aña aki 2022 e pais aki no ta suppose di ta na merced di desaroyonan internacional. Pa e motibo ey el a sugeri na Conseho di Minister pa cuminsa un investigacion, pa cuminsa un sondeo por ehemplo con gobierno por cambia tur su autonan pa autonan electrico, pa asina nan como gobierno pone enfasis riba sostenibilidad.

“Mi ta kere cu como pais nos tin cu bay den e direccion ey. Ns no por ta un pais cu ta dependiente di prijs di petroleo internacional mas”, minister a bisa.

Na e momentonan aki tin combersacionnan andando den departamento di Asuntonan Economico, como Banco Central y gobierno mes pa wak kico ta e posibilidadnan, minister Wever a finalisa.