Eagle LNG a cuminsa cu su dianan di informacionnan na pueblo den e MFA di Savaneta. Den e presentacionnan aki a duna un cobertura amplio di cada area di desaroyo di e proyecto, cual ta e rapportnan cu mester wordo completa, ki materialnan ta bay uza pa e proyecto, con e tuberia lo wordo poni, y mucho mas. A papia tambe di e aspecto tecnico y e beneficionan cu e proyecto aki lo trece pa nos pais.
Mi mester subraya cu tabata tin basta hende presente na e prome dia di informacion aki, y pa e gran mayoria, esaki tabata consisti di profesionalnan, empresarionan y tecniconan. Masha hopi pregunta a wordo haci na e expertonan di Eagle LNG y esakinan tur a wordo contesta detayadamente. E cantidad di pregunta ta refleha cu esunnan presente tabata desea di ricibi informacion corecto y alcaso. E ambiente di e reunion tabata hopi ameno y positivo y mester bisa cu mirando e expresion riba e cara di esunnan presente, tur a keda satisfecho. E grupo di hende a keda basta rato pa sigui combersa cu expertonan di Eagle LNG despues di e presentacion.
Lo tin e siguiente sesion di informacion di expertonan di Eagle LNG y tambe riba Diahuebs atardi/anochi di 6:00pm-9:00pm. Mi ta invita pueblo en general pa bin y scucha informacion valioso di e proyecto aki y haci bo pregunta sin miedo na e expertonan. Mi ta sigur despues di scucha y wak e presentacion di Eagle LNG, y scucha e contestanan riba e preguntanan cu lo wordo haci, bo tambe lo por conclui cu e proyecto aki ta magnifico pa nos pais!
