(ElNacional) – Brigadas Comunitarias Militares (Bricomiles) di Venezuela ta un plan gubernamental lansa luna pasa pa drecha centronan sanitario cu ta conta cu 250.547 boluntario den e area di salud, asina e minister di e cartera ey, Magaly Gutierrez, a informa diamars.
“Lo mester check na mundo henter si ta existi un movemento y un forsa organisativo den e teritorio di manera boluntario pa haci un trabao, lo mester check, pasobra mi ta kere nos ta pionero”, e funcionario a bisa durante un reunion cu Nicolas Maduro, transmiti pa e canal estatal Venezolana de Television (VTV).
E brigadanan aki a cuminsa forma dia 25 di juni ultimo, cu e obhetivo pa nan miembronan restaura centronan sanitario publico.
Gutierrez a indica cu den e sector sanitario tin 11.005 grupo, locual kiermen 82% di e obhetivo, cu ta 13.412 brigada di salud.
E minister, cu a bisa cu e meta ta pa crea un brigada pa cada consultorio popular, a destaca e participacion, no solamente di e personal di e centronan sanitario, militar y voceronan politico di e comunidadnan, sino tambe di plomero (loodgieter), trahadonan di construccion, electricista y trahadonan di otro ofishi cu a uni como boluntario.
Maduro a lansa tambe, den e mesun plan, e gruponan pa e reparacion di scolnan cu te cu e fecha, ta conta cu 23.832 brigada, segun Minister di Educacion, Yelitze Santaella, ken no a indica cuanto boluntario ta conforma esaki. Sinembargo, el a señala cu nan ta 90% di e obhetivo marca.
Dilanti e avancenan, Maduro a destaca e trabao boluntario. El a sigura cu e Bricomiles ta e contesta nobo pa pone na laira educacion y salud publico.
Segun Maduro, e consehonan comunal, e movemento Somos Venezuela, organisacionnan estudiantil y e Fuerza Armada lo traha den e reparacionnan aki cu nan ta pretende di extende na henter e teritorio.
