Den e conferencia di prensa e mandatario encarga cu finanzas a splica cu pa locual ta gastonan di PPP, e lama di gastonan ta cuminsa na 2017.
Prome cu esaki tabata tin e gastonan di e edificionan di BelFin, Centro di Husticia na Santa Cruz, Warda na Shaba, edificio di DOW y DIP. Na 2017 tabata paga pa e edificionan aki 30 miyon. Despues cu construccion acerca di e edificio- y careteranan den e formula di PPP manera MFA’s, Watty Vos Boulevard, Hospital y J.F. Kennedy Education Center, e gastonan a subi bay yegando awo te na 80 miyon pa aña. Aruba lo mester keda paga te na aña 2044 pa e edificio- y careteranan construi den forma PPP, esaki ta un caminda masha largo di debe. Y no ta cu gastonan a subi pa motibo di Tanchi….etc.
Minister Xiomara Maduro a sigui trece dilanti cu ta masha facil pa corta cinta, e ora tur hende t’ey. Aki e mandatario ta referi na oposicion en special Mike Eman, cu ta cuestiona cu gastonan di PPP a subi pero awo cu ta ora pa paga e proyectonan PPP, e kier lubida. Awor cu Mike Eman ta bishita casnan, e no mester lubida di bisa esaki. Ta kico oposicion kier haci cu nos Pais? Destrui nos Pais, baha gobierno? Esnan cu awor ta cuestiona no kier splica pueblo con e gastonan ta hinca den otro y pa e motibo aki e mandatario durante un conferencia di prensa na un forma simpel a duna informacion riba Finanzas Publico pa pueblo por compronde y haya sa e berdad completo, segun un comunicado di gobierno.
