Dialuna ultimo, Departamento di Cultura Aruba a anuncia e Proyecto Multidisciplinario: “Carrousel di Expresion, Talento y Creatividad” relaciona cu actividad di e plan vacacional crea exclusivamente p’e programa “Buki di Pret”.
Jhon Freddy Tobon Montoya, ken ta e persona encarga cu e proyecto aki, a informa na Bon Di Aruba cu e fecha di actividad ta diahuebs 28 di Juli 2022, cuminsando pa 12:30pm te cu 8:30pm na Cas di Cultura.
A informa cu e cantidad di post durante e tayer cu ta ofrece ta un total di 10 les cu ta inclui entre otro: Expresion Corporal, Pintura, Arte Visual, Teatro, Musica, Canto, Creatividad, Poesia, Baile, Stage Performance, Fotografia y un presentacion na final pa tur mayor y publico en general, pa mustra e resultado final cu cada mucha lo haya durante di e proceso di e tayernan.
E cantidad di participante cu e tayernan tin segun e capacidad ta pa acoge 100 mucha maximo y e edad pa participacion ta entre 6 te cu 12 aña. “Esaki ta e oportunidad pa tur mucha den e edadnan aki por forma parti di un plan vacacional, un programa di vakantie cu nos a traha basa den un buki cu a parti na tur scol y cu nan tin e chens di scoge cua ta e programa cu nan kier haci pa nan vakantie”, el a menciona.
Organisadonan di Buki di Pret a haya hopi importante, manera Tobon Montoya a splica, cu pa durante e programa lo tin algo relaciona cu cultura unda nan a crea “Carrousel di Expresion, Talento y Creatividad” cu e fin di por amplia tur disciplina artistico desaroyando un tema central, cu nan a titula ‘Chanita’. Esaki ta un tema hopi conoci pa muchanan y basa riba dje nan ta bay crea teatro, musica,arte visual y otronan rond di Chanita.
Ta p’esey nan ta pidi na tur mayor cu ta interesa pa inscribi nan yiunan y forma parti protagonico di dicho actividad, pa pasa na Departamento di Cultura Aruba durante oranan di oficina pa yena e formulario di inscripcion pa asina aki por garantisa e participacion di cada mucha.
Cada grupo ta ser forma pa 10 integrante y cada grupo ta numera y identifica cu diferente colo.
Tur integrante mester atende y participa den tur ronda di tayer, unda cada actividad ta ser realisa den 25 minuut cu 5 minuut pa cambia di post pa post, segun loke Tobon Montoya a menciona.
Despues di 5 post tin pauze y na final ta continua cu e otro 5 post restante y prepara pa e integracion y presentacion final.
Na final di e actividad, tur hoben di forma integral mester presenta e resumen di tur experiencia cu nan a biba durante di e tayernan y presenta esaki dilanti di un publico cu entrada gratis den sala Central di Cas di Cultura cuminsando pa 7:00pm.
Den cada post tin un maestro y un assistent pa yuda cu e formacion di grupo y cu tur e metanan di cada tayer cu tin pa alcansa.
E tema Central di Chanita ta di Letra di: Hubert Lio Booi y Musica di Padu Lampe y Ruffo Wever pa asina aki por sembra un simia y inculca diferente aspecto di nos cultura y tradicion den e curason di e muchanan.
Igualmente Tobon Montoya a expresa cu e idea ta pa sigui promove cultura pa via di diferente actividad, pa traha cu diferente departamentonan no solamente e plan vacacional aki enfoca den muchanan y hobennan, sino otronan na unda ta duna oportunidad na nan pa expresa nan mes den e mundo artistico.
“Nos ta semper habri pa duna tur posibilidad pa nos por tin mas diferente proyectonan cultural den scolnan basico y scolnan avansa” manera el a sigura, “pa asina ey apoya nan talento y hinca nan e amor patrio pasobra esey ta loke nos kier sembra na nan y nos ta kere cu nos a haci un bon trabou na unda nos cultura a haya su luga”, Tobon Montoya a manifesta.
Jhon Freddy ta un persona naci na Colombia cu tin 42 aña den experiencia artistico como docente cu ta aplica su pedagogia pa multiplica e conocemento cu e tin tambe tin como un artista multidisciplinario.
Cu 25 aña bibando na Aruba y trahando na Departamento di Cultura cu diferente proyecto, Tobon Montoya ta bin entregando su curason na cultura di Aruba “cu ta mi prenda” segun el a expresa.
