Despues cu siman pasa stacionnan di gasolin (pompstation) a causa conmocion den comunidad na momento cu nan a anuncia cu no ta bay acepta tarheta di debito of credito pa paga mas, sino cu tur hende mester paga cu placa cash, ayera minister di Asuntonan Economico, Comunicacion y Desaroyo Sostenibel Geoffrey Wever a manda un comunicado di prensa pa informa di e ultimo desaroyo den e tema aki.

Den e comunicado, minister Wever ta indica cu el a interveni inmediatamente despues cu e noticia a keda conoci. “Manera mi a tuma nota di e publicacion di e doñonan di stacionnan di gasolin, cu nan no lo acepta pago via tarheta mas y solamente cash, mi a tuma contacto inmediato cu Aruba Gas Dealers Association (“AGDA”) y tambe cu Aruba Banker’s Association (“ABA”) pa purba intermedia y wak con por yuda pa yega na un solucion”.

Dialuna mainta e minister a reuni cu AGDA y cu ABA pa scucha nan posicion, na unda el a puntra ABA pa temporalmente suspende nan decision pa cobra e fees (tarifa) en cuestion pa un periodo di 3 luna, pa asina gobierno haya tempo pa busca un solucion husto na beneficio di economia Arubiano sin perhudica e situacion financiero di e empresarionan, cual ta opera bao di margen di ganashi stipula pa ley.

“ABA a informa mi cu nan ta compronde e peticion di gobierno y cu nan ta suspende nan decision te cu 1 october proximo pa cobra e fees pa asina Gobierno haya tempo pa por intermedia y traha riba un solucion,” Wever a indica den un comunicado di prensa. Mirando e posicion aki di ABA, AGDA tambe nan a informa cu nan ta suspende nan decision te cu dia 1 october proximo, pues pa awor tur consumidor por keda paga cu tarheta di debito of credito na cualkier stacion di gasolin.

Manera ta conoci, AGDA a manda un comunicado tambe siman pasa den cual nan tabata informa cu e operacion di stacionnan di gasolin ta consisti di e benta di gasolin y diesel, na un prijs stipula mensualmente pa Gobierno di Aruba, pa medio di minister di Economia.

E modelo/formula a base riba cual e prijs aki ta wordo calcula ta un modelo di tempo di Lago. E modelo aki no ta inclui gastonan operacional cu nan ta bin ta enfrenta e ultimo 30 / 40 aña den mundo di comercio.

Por ehempel, e gastonan di mantencion, bancario, di seguro y aumento obligatorio door di decision di gobierno etc.

Specificamente e gastonan bancario, e asina yama “fees pa swipe cu Maestro / Debito” ta e ultimo druppel cu a causa e decision aki. Cualkier otro negoshi por calcula su gastonan, agrega su margen y asina dicidi riba un prijs di benta na su clientenan.

Den nan caso, esaki no ta posibel, nan ta splica cu ta traha a base di prijsnan y un margen di ganashi stipula pa Gobierno di Aruba.

Den e prijs calcula pa gobierno aki, tin un margen chikito per liter cu nan ta keda cune pa paga nan empleadonan, mantencion di nan stacionnan, seguro y tur otro gastonan operacional cu nan ta enfrenta. E suma actual pa un stacion di gasolin ta stipula na 14.5 cen pa liter di gasolin y 12.9 cen pa liter di diesel. Esaki no ta cambia ora cu gobierno ahusta prijs di gasolin of diesel, esaki ta un suma fiho, cu e prijs subi of baha.

Di e benta di 100 florin, stacionnan di gasolin ta keda cu unicamente 4.51 florin pa paga tur su gastonan, salario di empleadonan, pensioen di empleadonan, gastonan bancario, Elmar, Web, Setar, seguro, mantencion etc. Si e cliente paga cu Maestro, banco lo cobra 0.75 florin na comision (0.75% di cada transaccion) y e stacion lo keda cu solamente 3.76 florin pa cubri tur su gastonan. Lo demas di e 100 florin ta wordo paga na Gobierno di Aruba, directo of indirectamente, sea via departamento di impuesto, of via gobierno su compania estatal FMSA cu ta e unico distribuidor di gasolin & diesel na Aruba.

Na mesun tempo, AGDA tin cu menciona y gradici 2 banco cu pa decadanan a sostene nan miembronan door di no cobra nan e porcentahe na momento cu cliente paga cu un tarheta di Maestro / Debito na nos stacion. Sinembargo, siman pasa CMB a cuminsa cobra un comision riba cada florin cu nan cobra cliente, y RBC tambe lo ta introduciendo esaki. Nan miembronan a dicidi di uni nan mes ya cu nan no por sigui asina mas.

Den pasado nan a absorba obligatoriamente hopi gasto y aumento sin tin manera di recupera esakinan den benta. Un comision riba e benta, manera cu banconan lo bay cobra, no ta posibel pa nan absorba, mirando e subida di prijs di gasolin y diesel, e gasto lo keda subi, pa motibo cu banco ta cobra un porcentahe di e suma cu nan mester cobra cliente, no un porcentahe di nan entrada, ni tampoco un gasto fiho.

Ademas, redactor di Bon Dia Aruba a purba di haci algun preguntanan na minister Wever e dia di ayera pa haya mas informacion y despues el a anuncia cu awe mainta 10:00 di mainta e lo haci un conferencia di prensa tocante e topico aki, pa asina trece mas claridad na comunidad.