FTA y Manchebo Beach Resort a firma CAO nobo; “Nos ta solidario cu otro y e ora tur hende por pasa e momentonan dificil pa bay dilanti”

Durante un conferencia di prensa ayera diamars, Federacion di Trahadonan di Aruba (FTA) y hotel Manchebo Beach Resort a firma un CAO nobo. Sr. Antonuiz Kolman, Managing Director di Manchebo Beach Resort, hunto cu Sr. Rudy Geerman, vice presidente di FTA, a elabora ariba e CAO nobo aki y ki beneficionan esaki ta trece cune pa e trahadonan di e hotel.

Kolman a splica cu despues di cinco aña nan ta firma un CAO nobo, despues cu e CAO anterior a caduca dos aña pasa, pero pa motibo di e pandemia di COVID-19 mester a extende esaki cu dos aña mas. Aworaki den un tempo relativamente corto ambos partido a yega na un acuerdo.

“Nos ta contento cu nos a yega na un acuerdo pasobra nos ta consciente cu costo di bida ta bira mas caro y cu empleadonan mester mas salario”, Kolman a expresa

Pa loke ta trata e ocupacion di hotel y con reservacionnan ta bayendo te cu aworaki, Kolman a indica cu nan no tin nada di keha y ocupacion ta hopi bon. El a remarca cu e prijsnan cu nan ta ofrece ta hopi bon y e hotel ta draai bon manera na aña 2019, cu tabata un aña record pa Aruba den area di turismo y pa e hotel tambe.

Geerman, vice-presidente di FTA, a resalta cu FTA tin 30 aña caba ta negociando diferente CAO cu Manchebo Beach Resort y den tur e 30 añanan ta su mesun persona tabata encarga cu tur e negociacionnan aki.

El a subraya cu den tur e añanan ey berdad tabatin friccion fuerte na mesa entre e partidonan, pero el a enfatisa cu loke ta importante ta e honestidad. “Bo por ta con duro cu ta na mesa, pero nos tur sa cu nos ta ‘kinan pa bienestar. Si e hotel bay bon, e ta bay bon pa tur hende. E importante ta e meta cu bo tin, e respet mutuo. Nos a bay duro cu otro, pero e respet mutuo semper ta keda, semper ta pone cu bo ta bay logra”, el a agrega.

Geerman a gradici tur e personanan cu a participa den e negociacion y cu a traha pa logra e firmamento di e CAO nobo. El a gradici tambe trahadonan pa nan pasenshi, ya cu nan mester a warda y extende dos aña e CAO anterior. Pero el a remarca cu esey ta muestra di e confiansa tambe, pasobra na momento di votacion, e mayoria absoluto, tur hende, a bay di acuerdo cu loke a wordo negocia.

E CAO nobo ta di tres aña cu ta cuminsa riba dia 1 di januari 2022 y ta termina na december 2024.

Algun di e puntonan importante cu Geerman a resalta di e CAO nobo aki ta uno, pa loke ta aumento di gasto, nan a aumenta gasto di bril. Tambe nan a logra cambia e bracket di vakantie pasobra nos ley a cambia; y tambe nan a logra baha di seis dia pa siman pa cinco dia pa siman di trabao, cu tambe ta un beneficio.

El a sigui splica cu nan a ahusta tambe loke ta e plan di spaar, pasobra segun el a indica, nan ta kere cu mester forsa e trahadonan pa spaar. Nan a ahusta tambe e cashier bonus, pero el a remarca cu na e hotel nan ta sigui motiva pa no tin cash mas aki. “Aki nan ta purba di ta cash-free, pero toch tin hende cu ainda tin nan cash y e ora bo ta haya un suma di placa pa bo handle esey”, el a bisa.

Pa loke ta e departamento di F&B, tambe a conoce un aumento den loke ta e minimum point. Geerman a splica cu esaki masha poco e ta wordo usa, pero den e caso aki durante e pandemia nan mester a us’e y nan a aumenta esaki, cu nan ta kere ta hopi importante.

Den e departamento di housekeeping tambe a conoce un cambio, caminda nan a agrega un camber extra pa haci limpi y cada biaha cu un guest pidi pa pone cama extra den un camber, nan ta haya algo tambe pa esaki.

Geerman a enfatisa cu pa FTA personalmente locual ta mas importante – y den su opinion gobierno mester haci algo cu esaki – ta bin cu un pensioen general na Aruba pa yuda banda di esun di AOV. EL a indica cu nan a sinta negocia pa basta tempo caba pa bin cu e pensioen general y aunke gobierno a pone cu e minimo ta 6%, Manchebo ta na 8% caba. “Hopi hende no ta wak esaki y esaki tambe ta un beneficio enorme, pasobra nos tur ta bay yega na e edad cu nos tin cu baha cu pension. P’esey nos ta purba di convence trahadonan cu aworaki cu nan ta jong, spaar un tiki, pasobra mañan ta yega y nan mester di dje. Nos ta contento cu nos a logra haci esaki”, el a comenta.

Pa loke ta aumento di salario, el a splica cu e ta un aumento di 9% cu ta parti den tres aña, cual ta e tempo cu e CAO ta dura. El a menciona cu nan a pone cu tur hende ta haya un suma igual pa e proximo tres aña pasobra nan ta kere tambe cu mester yuda esnan cu ta gana menos. El a comenta cu claro no por haci esaki den tur CAO, pero den e caso aki nan a dicidi di hacie cu den e proximo tres aña tin un suma igual. “Nos ta solidario cu otro y e ora tur hende por pasa e momentonan dificil pa bay dilanti”, el a bisa.