Presidente di Sindicato ALVAST (Algemene Vakbond der Stafleden), Sr. Raymond Maduro a expresa durante un entrevista cu Bon Dia Aruba, nan malcontento cu e maneho y falta di comunicacion di parti di director di Elmar NV.

Sindicato ALVAST ta representa e staf, e hefenan, di e compania estatal y desde cu e director nobo a asumi su cargo na e compania, cual tabata na januari 2021, Maduro ta indica nan ta cuestiona su maneho. Esaki pa motibo cu desde cu el a cuminsa te cu aworaki, nan tin palabracion haci cu ta bisa nan tin cu sinta na mesa y papia un biaha pa luna pa discuti diferente topico cu ta encera e compania Elmar.

Pero te cu awe, un aña y siete luna despues cu e director a cuminsa, Maduro ta remarca cu dos biaha nan por a sinta cu e director y ora nan a sinta na mesa mes, nan no ta haya e notanan for di back of si nan logra hay’e mes, nan ta haya nan despues di dos, tres luna, cual ta hopi tempo.

Maduro a splica cu ALVAST su malcontento ta cu nan no tin contacto cu e director. Nan ta manda e-mail pidiendo reunion, pero nan no ta haya niun contesta for di e director. E persona di HR cu t’ey, cu tambe tin e mesun tempo na trabao cu e director, tampoco ta resultando manera debe ser.

El a comenta cu ALVAST tin un acuerdo traha cu e director di aña pasa caminda ta indica cu desde 1 di april di aña aki nan mester sinta na mesa pa cuminsa negocia, pero te dia di awe, Maduro a resalta, e director no ta respeta e protocol.

“E ta haci y deshaci. Pa colmo luna pasa el a biaha bay afo, nada contra cu e ta biaha, pero despues nos a bolbe puntr’e cu nos kier sinta cune pa papia pasobra tin hopi cos, desaroyonan na e compania cu no ta bayendo bon, pa nos papia. Pero el a bolbe biaha bay cu vakantie y nos no a haya contesta ni dje ni di HR”, Maduro a indica.

Segun e presidente di ALVAST a menciona, e director no ta duna nan niun contesta y ta ignora completamente e peticionnan di e sindicato. El a conta cu dia cu Utilities NV a nombra e director nobo di Elmar na januari 2021, como sindicato nan a busca su informacion, di unda e ta bin y eynan a resulta cu e tabata manager na hospital.

“Awo como manager pa bo bin ocupa un puesto di director na compania di Elmar siendo cu e no sa nada, kico ta come y bebe na e compania. Cu otro palabra bo ta un manager y bo ta bin ocupa puesto di director, bo no tabatin niun experiencia. Esey ta laga hopi di desea”, el a bisa.

El a subraya cu hendenan cu no tin experiencia ta haci y deshaci, y eynan ta unda e problema ta sinta entre e sindicato cu e director, pasobra no tin comunicacion. “Nos relacion cune ta nada, nos no ta haya nada di tende di dje. E ta haci tur cos di un solo banda, kiermen cu otro palabra e no tin prioridad, e ta hiba un maneho cu niun hende sa unda e kier hiba e compania”, el a agrega.

Maduro a subraya cu pa tin un paz laboral na un compania, como representante di e trahadonan, den e caso aki di e hefenan, nan mester tin un paz laboral y trankilidad y el a remarca cu nan ta e man drechi di e director, pero en bes cu e director sinta cu nan, su man drechi, pa busca solucion, e no ta worry y e ta haci y deshaci. Y a pesar cu tin hopi manera pa comunica, WhatsApp, e-mail, diferente otro medionan pa comunica, e director no ta duna nan niun tipo di contesta.

Maduro a splica cu e problema principal ta cu anteriormente nan tabatin un director, algun aña pasa cu a bay y e motibo pakico el a bay ta pasobra e funcionamento tabata den mesun direccion cu e director actual ta bayendo. “E tempo ey tambe nos a cuestiona e cos nan aki te hasta cu el a bay den un investigacion. Nos ta sintiendo cu den mesun direccion e cos aki ta bayendo”.

Maduro a duna un ehempel di e mal maneho cu e director ta hibando. El a conta cu na cuminsamento di e aña aki nan a nombra un persona den magazijn como Head of Purchasing and Logistics. E persona aki mester a cumpli, manera custumber, cu su dos lunanan di periodo di prueba, pero durante e periodo di prueba a ripara cu e no por a pasa esaki. En bes di mand’e cas, manera ta pasa cu tur hende cu ta nobo y no por pasa e dos lunanan di prueba, e director a baha e persona aki for di e funcion halto y a pone como djis un trahado di magazijn.

“Kiermen sin cu tabatin vacatura habri y esey pa nos ta parti di un administracion corupto”, Maduro a enfatisa.

ALVAST a acerca Utilities NV y a dos luna pasa nan a sinta den un reunion cu director di Utilities, Sr. Anthony Rojer, na unda e sindicato a splica e maneho di e director y a trece pa dilanti e problema aki tambe. Maduro a remarca cu nan a bisa Sr. Rojer cu e asunto no ta keda te eynan pasobra e ta algo cu mester wordo investiga mirando cu e director anterior cu nan tabatin, ta net den e parti di magazijn tur e problemanan tabata y pa e motibo ey mester a kit’e como director.

“Kico nos ta wak atrobe? E mesun direccion, e mesun cosnan ta pasando. Ora nos a papia cu director Sr. Rojer el a bisa nos cu claro cu e situacion no ta bon, pero el a bisa e lo bay papia cu nan. Te dia di awe cu nos a papia cune dos luna pasa, nos no a tende nada mas”, Maduro a comenta.

Por ultimo Maduro a enfatisa cu nan no ta dun’e ningun chance mas pasobra nan a ripara e su maneho, unda e ta haci y deshaci. Nan a acerca utilities pa hala su atencion, pero nan no sa si Utilities a papia cune of no a papia cune, pero nan a ripara cu no tin cambio.

“Nos no ta kere cu nos ta bay sinta na mesa. Ta bayendo pa un aña y shete luna cu e meneer t’ey. E meneer ta haci y deshaci. Pa mi e sapato cu e tin bisti ta mucho grandi pe”, Maduro a finalisa.