Partido MEP ta lamenta di constata cu Parlamentarionan di oposicion no ta di confia cu documento of informacionnan confidencial. Durante tratamento di e Ley di FASE na comienso di siman, Minister Glenbert Croes, un minister cu semper a traha na un forma transparente, a presenta na Parlamento un documento di rapport di Centrale Accountantsdienst (CAD) riba otorgamento di FASE. E documento aki a wordo Poni na disposicion di parlamentarionan durante tratamento di e ley y parlamentarionan di oposicion a haci mal uzo di esaki.
Ta trata aki di un documento interno cu Departamento di Finansa a manda pa Departamento di Recurso Humano (DRH) basa riba e investigacion di CAD pa asina DRH cuminsa e caminda pa tuma medida disciplinario contra e personanan cu a haya placa di FASE cu nan no mester a haya. E documento ta contene nombernan di e personanan aki cu no ta liga na nos Partido. E documento aki ta confidencial pa e motibo cu e ta contene nombernan di ciudadanonan di nos pais kendenan mientras tanto a wordo acerca pa DRH y a paga e suma cu nan a ricibi.
Mientras cu Minister Glenbert Croes a pidi Parlamento pa no divulga nombernan, oposicion a haya ta bon pa divulga e nombernan di e personanan aki toch mandando e documento aki rond den medianan social. Esaki ta un actitud cu Partido MEP ta condena, y cu ademas ta viola nos leynan.
Esaki ta un muestra tambe cu no por confia oposicion den Parlamento cu documentonan confidencial pasobra nan ta haci wega politico cu ne sin importa con nan por perhudica otro como tambe perhudica casonan disciplinario cu ta tumando luga. Cu esaki, Partido MEP ta di opinion cu nunca mas mester manda nada cu ta confidencial mas pa Parlamento.
