(AP) – E Minister di industria federal a bisa diadomingo cu e lo pidi pa reuni cu e ehecutivonan di Telecom despues di un blackout na Rogers Communications Inc. cu a stroba servicionan mobil y di internet na Canada, strobando varios servicio crucial.
Den un declaracion, Francois-Philippe Champagne a bisa cu e lo reuni cu Tony Staffieri, ken ta hefe ehecutivo y otro lidernan pa papia tocante mehoracion di “e rednan rond di Canada.” El a yama e incidente “inaceptabel.”
E blackout, cual a cuminsa diabierna mainta y a dura por lo menos 15 ora, a paralisa comunicacion den varios sector incluyendo cuido di salud, ley y e industria fianciero. Varios 911 servicio no por a ricibi mas yamada, varios hospital a reporta servicionan afecta y transaccionnan a ser pausa.
Staffieri a publica un declaracion diabierna pidiendo disculpa pa e blackout.
“Nos sa con hopi nos clientenan ta depende di nos rednan y mi ta pidi disculpa sinceramente,” el a bisa. “Nos ta particularmente lamenta cu nos clientenan no por a tuma contacto cu e servicionan di emergencia y nos ta tratando e problema como un prioridad urgente.”
Staffieri a bisa cu e servicionan lo keda restaura y tabata practicamente completamente operacional.
“Awo nos ta kere cu nos a logra yega na e posibel causanan pa un strobamento den e sistema di e rednan despues di a conduci un actualisacion na nos red principal, cual a causa cu algun di nos router no a funciona riba diabierna mainta,” Staffieri a declara.
Varios cliente a sigui reporta strobamento den servicio riba diadomingo. Rogers a publica un declaracion riba diadomingo bisando cu nan no tabata altanto cu algun di e clientenan te ainda tabata experienciando problema cu nan servicio.
Richard Leblanc, profesor di gobernacion, ley y etica na Toronto su New york University a bisa cu e blackout aki a demostra con vulnerabel e industria Canades, institucionnan financiero y sistemanan di cuido di salud ta na un atake riba nan sistema.
