(EFE) – Segunda Marquetalia, un disidencia di e desaparecido FARC, a afirma cu nan lider Luciano Marin Arango, alias “Ivan Marquez” ta na bida, despues di un “atentado criminal” cu el a sufri dia 30 di juni ultimo, cual ta kere cu a tuma luga den teritorio Venezolano.
“Afortunadamente el a sali ileso, solamente a sufri algun herida y ta gosando di bon salud. For di su refugio di combate lo sigui den e lucha di ideanan pa un Colombia nobo” e comunicado cu Segunda Marquetalia a publica ta señala.
E texto tambe ta indica cu e operacion cu a tuma luga contra “Ivan Marquez” tabata dirigi for di “cuartelnan Colombiano y cu apoyo di agencianan di inteligencia di Merca” y tabatin e mesun modus operandi cu a utilisa pa “asesina” Hernan Dario Velasquez, alias “El Paisa”, of Henry Castellanos conoci como “Romaña” y Seuxis Pausias Hernandez alias “Jesus Santrich”.
Riba un video publica, por mira un grupo di guerrillero lesando un comunicado den cual tambe ta acusa e presidente saliente, Ivan Duque, di no solamente “destrui” e acuerdonan di paz na La Habana, sino tambe di “exporta” mercenario pa mata lidernan na diferente parti di mundo, haciendo referencia na e grupo di Colombianonan deteni na Haiti pa supuestamente participa den e magnicidio di Jovenel Moise.
“Gobierno di Duque ta un di e pio y mas inoperante cu a goberna Colombia den ultimo tempo. Mas di 700 lider asesina, mas di 300 firmante di e acuerdo asesina, represion pa protestanan social y a bin back e falso positivo”, un di e guerrilleronan a señala riba e video.
Ta conoci cu autoridadnan Colombiano a sigura cu “Ivan Marquez” por a muri den un enfrentamento na Venezuela. Dden ultimo dianan Gobierno a maneha un otro version den cual e lider di disidencia por ta bibo y cu posiblemente su heridanan ta wordo atendi na e pais bisiña.
