Durante weekend, den medionan di comunicacion local a circula e noticia di e detencion di un persona identifica como Sciandri Lesire, di 28 aña di edad, residente na Tanki Flip, a keda deteni despues di un denuncia. E noticia aki a hala atencion di prensa Venezolano, ya cu segun nan ta reporta, e persona cu a haci e denuncia ta un dama originario di estado Zulia, na Venezuela.
Segun Prensa Punto Fijo, un persona originario di Venezuela a acudi na organismonan di seguridad pa asina por caba cu presunto hecho di violencia sexual y psicologico contra tres mucha, entre nan, su yiu muhe di apenas cinco aña di edad. Portal noticiero local, 24ora a reporta cu e persona aki ta ex-pareha di Lesire, Josselyn Romero, kende den un entrevista a conta e noticiero tocante e sucesonan cu a conduci na e denuncia.
Segun informacion den medionan di comunicacion local y internacional, e victimanan di Lesire ta dos mucha muhe y un mucha homber, di cuatro, cinco y seis aña di edad, kende aparentemente a wordo ataca sexualmente pa e sospechoso.
Mientras cu Romero a bin dilanti, informacion ta indica cu e otro dos victima tambe ta yiu di muhernan cu ken e sospechoso tabatin un relacion sentimental. E confiansa deriva di e relacionnan aki a facilita e sospechoso pa practica su violacionnan.
Segun Prensa Punto Fijo, Romero, mama di un di e victimanan a dicidi di denuncia e tata di su yiu muhe despues di haya sa di e tristo suceso contra su yiu. Den su declaracionnan, el a bisa cu e relacion cu Lesire a termina dos aña pasa, y e ta sigura cu e mes tabata victima di agresion, maltrato fisico y psicologico na man di Lesire. Sinembargo el a mantene contacto cu e sospechoso ya cu ta tata di su yiu.
E determinacion di Romero tabata pa tuma contacto cu e ex-parehanan di e sospechoso, y asina el a descubri cu lamentablemente, Lesire a yega di abusa di otro muchanan tambe. E menornan ta ricibiendo atencion di psicologonan specialisa den abuso di mucha.
E prome indicacionnan di e caso a bin di e grupo contra abuso sexual di mucha, Ta Basta, cu riba su pagina di Facebook a publica cu nan a ricibi un mensahe relaciona cu detencion di Sciandri Lesire na su cas na Tanki Flip diasabra mainta, dia 9 di juli.
“E persona en cuestion a wordo deteni door cu a abusa sexualmente di tres (3) muchanan menor di edad.
Dos mucha muhe y un mucha homber. For di 2018 a haci declaracion contra e persona en cuestion.
Awo e lo sigui caminda pa asina e haya su castigo pa su actonan inmoral”, e administradornan di e grupo a publica. Den e mesun mensahe, nan a curasha pueblo pa haci denuncia den casonan di abuso sexual di mucha.
Rednan social na Aruba tabata sacudi pa e noticia, cu cantidad di hende expresando nan repudio pa e actonan di cual e sospechoso ta acusa di a comete. Alabes, maske famia di e sospechoso a expresa sorpresa, otro usuarionan di rednan social a expresa di tabata wardando caba pa e detencion aki, asina indicando cu e hechonan tabata un secreto habri den comunidad.
Potret: Grupo Ta Basta.
