(AP) – Elon Musk a anuncia riba diabierna cu e lo bandona e trato di 44 biyon dollar pa cumpra Twitter despues cu e compania no a provee suficiente informacion tocante e cantidad di cuentanan falso riba e plataforma. Twitter inmediatamente a reacciona, bisando cu nan lo demanda e CEO di Tesla pa obliga su persona cumpli cu e trato.
E decision aki, cual varios a premira caba, tabata e desaroyo mas recien den e saga entre e homber mas rico den mundo y un di e plataformanan social mas influencial, cual ta menasa di trece un bataya legal.
Twitter por a pidi e suma di 1 biyon dollar pa disolve e trato cu Musk a keda di acuerdo cu e lo paga bao di e circunstancianan aki. Na luga di esaki, nan ta cla pa bay corte pa asina lucha pa completa e compra, cual e compania su hunta directiva a aprobba y CEO Parag Agrawal a insisti cu e kier pa tuma luga.
Den un carta na Twitter su hunta directiva, Musk su abogado Mike Ringler a entrega e keho di su cliente unda cu e ta bisa cu pa casi 2 luna el a pidi datonan pa huesga e cantidad di cuentanan “fake of spam” riba e plataforma di red social.
“Twitter no a provee of a nenga di provee suficiente informacion tocante esaki. Den algun ocasion, Twitter a ignora e peticionnan di Mr. Musk pa motibonan cu ta aparentemente sin hustificacion, y otro biahanan a bisa di a cumpli dunando Mr. Musk informacion incompleto of informacion cu no tabata util,” e carta a bisa.
Musk tambe a expresa cu e informacion ta fundamental pa e negoshi di Twitter y su resultadonan financiero, y ta necesario pa asina por completa e adkisicion.
Den su respuesta, hefe di Twitter su hunta directiva, Bret Taylor a publica cu e hunta ta “comprometi pa completa e transaccion cu e prijs y terminonan cu a ser stipula” cu Musk y tin “plan di persigui accion legal pa sigura cu e acuerdo ser cumpli. Nos tin e confiansa cu nos lo prevalece den Delaware Court of Chancery.”
E corte aki na Delaware frecuentemente ta maneha disputanan entre negoshinan conhuntamente cu e varios corporacionnan, incluyendo Twitter, cu ta incorpora na e corte aki.
