(EFE) – Un militante di partido di presidente Brasileño, Jair Bolsonaro, y otro siguido di ex-mandatario Luiz Inacio Lula da Silva a mata otro cu tironan na ciudad di Foz di Iguaçu, debi na “un discusion” na e fiesta di hacimento di aña di un di nan, segun fuentenan oficial y politico a informa ayera diadomingo.
E hechonan a sucede diasabra ultimo den oranan di marduga, ora un polis federal a interumpi e celebracion y tira mata Marcelo Arruda, ken tabata guardia municipal y un di e lidernan di Partido di Trahadonan (PT) na Foz di Iguaçu, di acuerdo cu informacion.
Arruda, ken tambe tabata candidato pa vice-alcalde na e localidad fronteriso Brasileño den eleccionnan municipal di 2020 y tabata celebra su di 50 cumpleaños, a ricibi “tres tiro”, pero a keda bibo y a tira su agresor back, ken tambe a muri den e luga, segun un nota di PT cu a ser publica ta indica.
Fuentenan policial a señala cu e polis federal, identifica como Jose da Rocha Guaranho, e cual a invadi e fiesta a ser declara como ‘Bolsonarista’.
Prome cu e final fatal, Da Rocha a acudi pa prome biaha na e luga di e celebracion, na Asociacion Deportivo Salud Fisica di Itapu, y a menasa “cu arma di candela den su man” na personanan presente, segun PT.
Despues a bin back na e local y e ora ey e tiramento a cuminsa dunando como resultado e fayecimento di e dos militante politico.
Polis Civil di estado di Parana den un nota a firma cu “a trata di un discusion” y anuncia cu a habri un investigacion pa duna “mayor informacion tocante e motibonan di e crimen”.
E suceso a tuma luga den menos di 90 dia cu ta falta pa eleccionnan presidencial, pa e cual Lula ta como faborito, cu un bentaha di entre 15 pa 20 riba Bolsonaro, segun sondeo publica te e fecha.
