Recientemente tin bastante atencion pa e tema di sclavitud, tambe relaciona cu nos pasado como Aruba cu e tema aki. E sclavitud, specificamente esun di transporte y uso di hende for di continente Africano, ta un di e berguenzanan mayor di humanidad y ta parti di nos historia tambe. No tin motibo pa cera wowo pa e realidad ey, tampoco pa e hecho cu den diferente forma, sclavitud y traficacion di ser humano ta algo cu ta existi grandemente na mundo ainda, a pesar di tur legislacion nacional y internacional contra esaki.

Di otro banda, nos mester por contempla tambe e cosnan bon cu e pasado colonial a trece pa nos. Un di e tesoronan cu nos a hereda ta nos idioma Papiamento. Gran mayoria di linguista y historico ta relaciona surgimento di Papiamento cu e transporte di hende for di costa occidental di Africa, di diferente fortificacion cu e paisnan Europeo tabatin, inicialmente e Portuguesnan y despues Hulandes y otro nacionnan Europeo. E transporte di hende, specificamente pa Curaçao, a inicia muy probablemente for di e puesto Portugues na Cacheu, cu te den siglo 19 tabata e capital di e colonia Guine Bissau.

Importante ta pa señala cu comercializacion di esclavo for di costa occidental di Africa pa Spaña y Portugal tabata tuma lugar caba como un siglo promer cu Cristobal Colon a yega costa di nos continente. Na e fortificacionnan Portugues e lingua franca di comunicacion entre Portugues y habitante local probablemente ya a tuma forma como un siglo promer cu transporte di catibo pa continente Americano a inicia. Esey ta splica tambe e surgimento di e Criol di Cabo Verde, cu tabata e stacion intermedio den transporte for di costa di Africa, pa America y Europa.

A proposito, na otro banda di Africa, den tempo di e imperio Romano caba tabatin comercio di esclavo cu Europa. Por lo tanto, e idea di cuminza manda esclavo pa e continente recien descubri, pa cumplii cu e demanda laboral di e plantacionnan, no tabata un novedad sino un practica Europeo di mas di un milenio.

Na Curaçao e presencia fuerte di comerciante di descendencia Portugues a yuda mantene influencia di e elemento Portugues den e lingua franca cu a sigui desaroya despues. No ta pornada e promer documento reconoci na Curaçao como skirbi na Papiamento ta un carta cu un comerciante Portugues ta manda pa su casa. Sobrevivencia di Papiamento den un ambiente unda tabatin un idioma colonial totalmente diferente, muy probablemente tin relacion cu e hecho cu el a bira e idioma di comunicacion diario di henter pueblo, no solamente di e persona di descendencia humilde.

Papiamento a haya su caminda tambe pa e otro islanan, Aruba y Bonaire. Cerca nos na Aruba tabatin, y tin te awe, un influencia fuerte di idioma Spaño, cu ta sirbi como fuente principal pa ampliacion di vocabulario. Banda di esaki naturalmente a bin acerca e influencia di Hulandes y Ingles, pa completa loke awe ta base di nos idioma.

E surgimento di idioma intermedio como forma di comunicacion den e diferente colonianan di paisnan Europeo, no a conduci na reconoce e idiomanan aki como idioma riba nan mes den mayoria di teritorio. Por bisa cu Aruba ta destaca como esun unda reconocimento di su idioma ta mas avanza, cu reconocimento pa ley como idioma oficial. Esey no mester sirbi solamente como motibo di orguyo, pero ta trece cune loke Francesnan ta yama ‘noblesse oblige’; e obligacion di cultiva y mehora esaki, si di berdad nos ta consider’e un tesoro… Basicamente esey tambe ta e base di e column aki, cu orguyo y respet pa loke pasado, cu su cosnan mahos y repudiable, a laga pa nos.