E diferencia di opinion entre gobierno di Aruba y e entidad supervisor CAft no a termina ainda, tampoco despues cu gobierno a haya algun dia extra pa cumpli cu e requisito legal di contesta e carta di 10 di juni ultimo, di e entidad consehero di gobierno di Reino. Den su contesta extenso a keda algun area importante cu por causa cu e diferencia di opinion ta continua.

Un punto di controversia clave ta e interpretacion divergente di ambos di e asunto di moderacion di gasto di personal. Ta dificil pa imagina cu CAft lo bay di acuerdo cu e version cu gobierno ta duna na e tema, unda no tin nada cumpli ainda den sentido structural. Gobierno ta maneha e punto di vista cu e recorte di 12,6% ta algo temporal y no tin nada di haci cu e asunto di reforma structural. Aki nos por ta di acuerdo cu gobierno; e ta un asunto temporal cu gobierno lo mester coregi, pero… ‘a su debido tiempo’. Loke ta pasando awor ta cu, mientras cu gobierno ta coriendo deficit grandi ainda; e aña aki lo mester fia 227 miyon florin y otro aña un 120 miyon mas, ya ta declara cu ta duna e empleado full su salario back pa 2023, mientras hopi den sector priva, cu ta traha cu un salario corta cu 25 o 30%, y hasta mas, mester yuda paga e salario completo di e ambtenaar. No ta berdad cu tur hende den sector priva, cu regreso di turismo, awor ta di regreso na nan salario anterior.

Y den e punto aki nos no tin nada di haci cu loke a palabra cu cualkier secretario di estado: bo no por hunga Sinterklaas mientras e pais ta den un situacion financiero grave ainda. No ta hustifica pa paga 100% di salario, a base di placa fia cu comunidad mester bay paga back, y nos ta caba na practicamente 6.000 miyon di debe…

Y ta parce cu Hulanda tambe a actua riba esaki, poniendo un condicion extra: Aruba por duna back 100% di e salario anterior na e empleado publico, y otronan den sector semi-publico, siempre y cuando ta percura pa un presupuesto 2023 cu ta contene un surplus…

Den su contesta na CAft gobierno di Aruba ta referi na e proyecto di presupuesto 2023 cu a bay caba pa CAft dia 9 di juni ultimo. Esey riba su mes ta bon noticia, pasobra e ta significa cu gobierno ta serio den trata, contrario na añanan anterior, di tin un proyecto di ley di presupuesto na tempo na parlamento. E pregunta ta keda si e presupuesto ey ta cumpli caba cu e exigencia di gobierno di Reino, cu kier mira un presupuesto balanza na 2023.

Otro tema relaciona cu e diferencia di opinion ta e gastonan di bienes y servicio, unda gobierno a dicidi di publica un comparacion cu otro paisnan di nos region, haci pa IMF riba peticion di gobierno. Esaki ta un bon iniciativa y lo ta bon pa hacie na mas ocasion, pa diferente tema tambe. Den e caso particular aki Aruba ta resulta na un nivel generalmente aceptable, pero esaki no ta splica tur cos. Pa cuminza, ta remarcable cu e paisnan cu porcentualmente ta gasta mas di nan GDP na bienes y servicio ta un serie di pais hopi mas chikito cu Aruba, manera Montserrat, Dominica y St Kitts & Nevis, cu ta carga e desbentaha di cierto gasto fiho riba un poblacion, y GDP, hopi mas chikito. E punto clave den e discusion aki sin embargo no mester ta cuanto ta gasta, sino na kico? Den e ultimo añanan a bira mas dificil pa haya un vista general di e gastonan den detaye, loke ta haci trabao di parlamento mas dificil tambe. Mester tuma na cuenta cu e capitulo di presupuesto aki por ehemplo ta contene un suma considerable di e pago di contrato temporal cu personal, cu no ta haya un contrato normal temporal den servicio di gobierno, sino un contrato di suministro di servicio, aboliendo gran parti di e derechonan laboral normal di un empleado, e asina yama “Dienstverleningsovereenkomst (DVO)”. Esaki no ta nada mas cu un triki pa e gastonan aki no aparece riba e payroll oficial di gobierno. En todo caso, nos no ta mira e asunto aki como uno principal. E Protocol di 2018 no ta menciona explicitamente e tema di bienes y servicio, pero si reduccion di gasto di personal, unda no ta mira un acuerdo ainda.

Tambe gobierno y CAft lo keda cu diferencia di opinion riba e tema di e presupuesto multi-anual, di cual tin un version nobo den e presupuesto 2023 presenta luna pasa. Den su contesta gobierno ta referi na e consecuencianan di e crisis di Covid riba e situacion pa e proximo añanan, cual lo mester hustifica cu ta keda core cu deficit pa varios aña mas, mientras cu Hulanda ta pusha pa stop di fia mas desde 2023 caba. Gobierno tin razon unda ta mustra riba e cautela necesario pa loke ta desaroyo economico den e temponan actual asina insigur, loke por bay tin efecto riba entrada di gobierno. Di otro banda esey ta lanta e pregunta pakico anto, si ta premira posiblemente menos entrada, ta keda insisti cu no ta baha gasto, y cu mester fia mas placa pa cera aña. Ta e insistencia aki aparentemente tin e partnernan Hulandes irita, y no solamente CAft.