Prome Minister ta splica e sindicato cu ta oposicion a crea comision cu ley di FASE

Pa SIMAR, tabata cu asombro y desapunto pa a mira con Parlamento a aproba e ley di FASE, mientras cu ehecucion di e programa tabata ilegal. Asina a informa Secretario di Estado, Alexandra van Huffelen e siman aki. Pero mescos tabata e sorpresa pa Presidente di SIMAR, Josephine Albertus di a ricibi splicacion di Prome Minister Evelyn Wever Croes.

E carta cu SIMAR a manda a bay pa e mandatario Hulandes no tabata dirigi pa Gobierno di Aruba, ni a pone un copia pa Prome Minister disponible. E carta tabata strictamente pa ilustra e disgusto con Parlamento a aproba e ley a pesar di rapportnan negativo riba con Gobierno a anda cu contribucionnan di miembronan di entre otro SIMAR na e fondo di FASE.

Den e carta pa Secretario di Estado Van Huffelen, Albertus a bisa cu e rapportnan di ARA y di CAD a mustra cu no tabatin suficiente garantia pa uso debido di fondo publico.

SIMAR ta enfatisa e sacrificionan cu ciudadano haci tabata den luz di e pandemia, pero cu semper a sali di punto di bista cu e recortenan lo a keda elimina ora cu situacion a normalisa. P’esey mes, na momento di lesa cu 7 miyon florin di FASE a bay na pagonan cu no tabata debido, e sindicato a sinti e necesidad pa acudi na e mandatario Hulandes. Particularmente pasobra ningun hende a asumi responsabilidad pa e iregularidadnan, abuso y uso indebido di e proceso di FASE, ya cu coalicion a aproba e ley FASE Temporario cu ta bisa cu tur pago ta legalmente cubri.

“Den articulo 6, inciso 3 di e ley ta skirbi cu e Minister por cobra sumanan di mas of indebido paga. Pero, na nomber di nos miembronan nos kier duna di conoce nos disgusto y e sentido di engaño, ya cu nos derecho di propiedad, esta salarionan a keda afecta seriamente. Nos ta sinti nos mes engaña ya cu awor ta resulta cu un parti di e pagonan a sucede a base ilegal, mientras cu e ley no ta proteha e trahadonan pero si ta cubri e responsabilidad di e Ministernan envolvi,” Albertus ta informa Secretario di Estado. E lider sindical ta bisa cu ainda no ta cla si berdad lo logra debolbe parti di e recorte manera Gobierno a anuncia. “E ta inaceptabel y repudiable cu ta anda asina iresponsabel cu nos derecho di propiedad y ta bay contra e principionan democratico, y ta ilustra mal gobernacion.”

Ta oposicion a crea conmocion

Prome Minister Evelyn Wever Croes di su banda a reconoce cu e carta no tabata dirigi na Aruba, pero basa riba e preocupacion expresa na Secretario di Estado, kier a bisa cu ta tuma esakinan na cuenta. Segun Prome Minister, tabata oposicion cu a crea conmocion na momento di a trata e ley y Wever-Croes ta haya cu no mester saca informacionnan for di nan contexto. “A tuma diferente medida asina cu CAS a saca su rapport (red. December 17, 2021). Y awor cu e ley a keda acepta pa Parlamento, e ta duna e Minister competente e autoridad pa cobra locual a paga di mas, asina leu cu e no a sucede caba.”

Prome Minister a elabora extensamente con Gobierno mester a bin cu e sosten di emergencia, sin un cuadro legal ya cu no por a warda pa brinda ayudo y a ripiti e mesun ponencia cu Minister Glenbert Croes a bisa, esta cu Direccion Legislacion y Asuntonan Huridico, DWJZ tabata envolvi for di principio. Mas ainda, cada biaha tabata busca aprobacion di Conseho di Minister, entre otro pa amplia e grupo cu mester di FASE. “E Minister a responsabilisa su mes tres biaha (na Parlamento) y pa e motibo ey, Gobierno no ta comparti opinion di SIMAR cu a anda cu descuido cu derechonan di propiedad di trahadonan publico y pensionadonan.”

Evelyn Wever Croes den su carta a duna un bista amplio di e posibel preocupacionnan constata y e accionnan cu a tuma. Por ehempel, den e rapport di CAD a sali afo cu 35 persona a ricibi dos pago durante e mesun periodo. Prome Minister a ilustra cu motibonan di e pagonan dobel aki ta pasobra un persona ta haci peticion di FASE y ta yena e formulario varios biaha cu diferente number di identificacion, sea cu un prueba di identificacion comprobabel of no, den sentido cu no por a verifica e number a base di e prueba aki. Of un persona a haci peticion pa FASE como trahado, pero tambe como empresario independiente y ambos peticion a keda trata separadamente. Otro ta un empresario independiente a pidi FASE pa diferente di su empresanan, sea den combinacion cu otro. “Aki por pensa riba un chauffeur di bus cu tambe ta huur apartamento,” mr. Wever Croes a splica. Pero tambe a bin casonan unda esun cu a pidi a usa un cuenta di banco y/of unda e partner tambe ta bin na remarca pa FASE. “Pero, mirando cu ta dos peticion individual, nan no ta cay bao di pago dobel.”

Segun Prome Minister, na momento di a nota e pagonan dobel a tuma accion mesora, unda entre otro a informa e personanan envolvi cu ta para e pago di FASE, pa asina desconta e lunanan cu a paga di mas.

Un total di 1463 persona a ricibi tanto FASE como subsidio di salario, pa motibo cu e sosten di emergencia FASE a drenta na vigor prome cu e subsidio di salario. CAD mes a bisa cu SVB a informa cu dunadonan di trabao cu a paga gran parti di e subsidio di salario paga desde Mei 2020, pero cu durante e investigacion riba FASE, ainda no tabata procesa den e sistemanan di e banco di seguro. “CAD a bisa cu e sumanan menciona den e rapport posiblemente por a keda entrega back caba, pues a tuma accion mesora.”

Prome Minister a pasa riba tur e otro puntonan cu CAD a señala, por ehempel e 49 persona cu a cobra tanto bijstand como FASE, e 749 personanan cu a keda den servicio di companianan cu no tabata vulnerable (no a haci un evaluacion di entrada di personanan cu por tabatin otro entrada). “Ta cobra back e pagonan indebido,” Wever Croes a bisa.

Igualdad

Pa loke ta e pensionadonan cu a ricibi FASE, ta trata aki di hendenan cu tabata traha pasobra nan pensioen no tabata suficiente. Y aki si Conseho di Minister a bay di acuerdo pa trata e grupo aki igual cu otro cu a perde trabao, basa riba principio di igualdad. Mescos ta conta pa e 156 persona cu tabata traha part-time pa mas cu un doño di trabao y a ricibi FASE.

Dos persona a fayece durante e periodo cu nan tabatin derecho pa ricibi FASE pa un periodo di tres y dos luna, y 38 persona a emigra a pesar di a ricibi FASE, pa un total di 77 mil florin. E pagonan automatico a sucede durante e periodo di ‘shelter in place.’ E momento ey no por a cobra e fondonan back, “pero awor cu tin e ley, lo por cobra bek e locual posiblemente a paga di forma indebido.”

E motibonan pakico 29 persona riba payroll di Gobierno a ricibi FASE ta varios, Prome Minister a sigui splica. Entre otro cu algun a drenta den servicio publico despues di a pidi FASE cu tabata pa tres luna. Ademas, algun tabatin derecho pa haci otro trabao y ya cu no por a sigui cu esakinan, a cumpli cu condicionnan pa ricibi FASE. “No a mira si esun cu a pidi FASE tabatin otro trabao.” Pero awor Gobierno como dunado di trabao pa medio di DRH lo trata e casonan ay pa mira con mester atende cu nan. “E proceduranan aki ta tuma tempo y nan no ta completa ainda.”

Recorte

E Prome Mandatario a sigura SIMAR cu ta haci tur esfuerso pa cumpli cu condicionnan basa riba palabracion cu Hulanda, pa asina por cumpli cu e pago di 5 porciento di e recorte entrante 1 di Juli 2022. El a finalisa ta gradici e sindicato y e miembronan pa e solidaridad demostra durante periodo dificil cu Aruba a pasa a aden.

Mester bisa cu Prome Minister Wever Croes a manda copia di su carta pa SIMAR pa Secretario di Estado Van Huffelen, y pa Josephine Albertus, e tabata straño di a hasta ricibi dicho reaccion den oranan di anochi di Diahuebs. “Mi no tabata ni pendiente di dje. Pero manera nos a splica, nos a manda nos carta Hulanda y otro siman nos tin combersacion cu nos abogado pa wak kico pa haci. Pasobra nos punto ta cu e trahado ta keda entrega e 12.6 porciento, no tin claridad riba e 5 porciento y a anda iresponsablemente cu e fondo cu tabata placa cu a kita di e trahado,” el bisa Bon Dia Aruba.