(LaPatilla) – E pandemia di COVID-19 ta sigui presente na Venezuela. E cantidad di persona contagia a aumenta na e pais y diferente specialistanan di salud ta confirma cu e pais ta den su di cuater ola di e virus.
Entre e factornan principal pa e aumento di personanan contagia tin e relahacion extremo di e ciudadanonan, cu den gran mayoria no ta usa of no ta pone corectamente den practica e medidanan di bioseguridad, e falta di informacion, y prevencion emiti door di e gobierno nacional, e gran cantidad di poblacion sin vacuna y e realisacion di concierto- of reunionnan cu multitudnan grandi den e ultimo dos lunanan, juni y juli.
Dr. Deyanire Gentile, miembro di e directiva di Colegio de Medicos, a destaca cu e causa principal di e aumento di casonan na Venezuela ta debi na e existencia di un relahacion extremo di gran parti di e ciudadanonan.
“E personanan ta cana sin tapa boca y nan no ta labando nan mannan. Esey ta e medida cu a wordo bandona mas lihe. Anteriormente e personanan tabata cana cu nan hand sanitizer y nan alcohol, pero aworaki nan no ta haciendo esey mas”, el a indica.
Segun Dr. Jaime Lorenzo, presidente di e Organisacion Medicos Unidos de Venezuela, e datonan oficial ta duna solamente un idea minimo di e enfermedad, pero e gobierno nacional no ta informa di manera specifico e cantidad real di casonan. E aumento por ta hopi mas grandi di locual e cifranan oficial ta indica door di e cantidad di persona cu no ta registra y cu ta contagia cu COVID-19.
“E number di casonan informa ta hopi mas abao cu e realidad. E casonan di persona contagia ta hopi mas halto cu e cifranan cu e fuentenan oficial ta maneha y comparti”, e dokter a comenta.
Debi na e falta di informacion conhuntamente cu e falta di consenshi di e ciudadanonan, actualmente e di cuater ola di COVID-19 cu e variante Omicron y otro variantenan ta golpiando Venezuela. “Di un 100%, solamente 10% ta usa corectamente e medidanan di bioseguridad, e otro 90% no ta usa nan y of no ta usa nan corectamente”, Lorenzo a apunta.
