(EFE) – Corte Constitucional di Colombia den un sentencia a determina cu “menornan di edad tin derecho na identidad di genero”, loke tambe ta implica nan derecho “pa haya tratamento medico di afirmacion di genero” aunke nan no ta alcansa e edad di 18 aña.
Di e forma aki, Corte a bisa na Ministerio di Salud pa cu prome cu un aña lo crea un guia practico clinico y protocolnan pa “atencion integral den salud di personanan transgenero y, particularmente, pa e suministro di e proceduranan medico di afirmacion di genero”, segun un comunicado di prensa di ayera diahuebs a bisa.
E decision aki a ser tuma despues di un accion di proteccion presenta pa un hoben di 16 aña cu kier a ricibi terapia hormonal, despues cu un psikiatra infantil a confirma cu e no tabata conforme cu su identidad di genero.
E hoben aki a ser manda na december di 2020 pa un specialista e cual a bis’e cu pa e por ricibi tratamento e lo mester a cumpli e mayoria di edad y a ordena varios test pa averigua “si su intencion di realisa e tratamento ta obedece algun desorden hormonal”, segun Corte a señala.
“Tur obstaculo cu ta impedi e persona di ta loke e kier ta y pa construi un plan di bida of cu ta restringi su derecho di manifesta su identidad di genero ta un violacion di su derechonan fundamental”, Corte Constitucional a determina y tambe a sigura cu e proceso medico “tabata un violacion di e derecho di salud di e menor di edad”.
Segun Halto Tribunal, “sistema di salud mester brinda un servicio eficaz, oportuno y integral pa haci posibel e reafirmacion di genero” y p’esey a ordena Ministerio di Salud pa tin protocolnan claro pa garantisa esey.
