GLW Foundation a keda hopi gradici pa evento di recaudacion cu a ser haci pa yuda e mucha Angelaine Fingal diadomingo ultimo 03 di juli e cual a tuma luga na Centro di Bario Playa Pabao na unda tur e fondonan ta bay wordo usa pa Angelaine su salud.

Asina George Winterdaal di GLW Foundation a expresa pa Bon Dia Aruba e dia di ayera caminda el a duna danki na tur comerciante cu a duna su apoyo diadomingo ultimo den evento pa Angelaine cu ta un mucha di seis 6 aña cu den aña aki a wordo descubri cu cancer den su sanger – leukemia.

Diadomingo ultimo na centro di bario nan a bende diferente cuminda y cosnan dushi for di 10or di mainta te cu 6or di atardi unda cu ya caba pa 5or nan a bende tur cos, esey kiermen cu hende a scucha e yamada a bay sostene e evento aki.

“Danki na comunidad di Aruba, pasobra nos por pidi pa haci evento, pero si e hende no ta support nos ta keda den mesun caminda”, Winterdaal a señala.

Di loke ta trata Angelaine, na e momentonan aki e ta na Hulanda unda cu el a bay for di luna di februari ora su famia a haya sa cu e tabatin e enfermedad aki loke ta implica e gastonan extra, su mama mes a kita for di trabou pa e por biaha cu su yiu, bay Hulanda cune y nan ta haya ayudo di AZV pero esey no ta cubri e gastonan completo como cuminda, luga di biba, etc, manera Winterdaal a expresa.

“P’esey nos a haci e evento aki pa por duna e famia un tiki espacio financiero” el a declara.

Tambe tin un otro fundacion cu a acerca GLW Foundation pa nan tambe haci un evento y asina ey sigui yuda Angelaine cu tambe lo wordo duna na su famia.

E cantidad cu nan a logra recauda den evento di fin di siman ultimo na centro di bario Playa Pabao ta aproximadamente 5.000 florin segun loke Winterdaal a sigura.

Na augustus pasa nan tambe a organisa e evento di Radio-Telethon pa asina ey yuda Shadienskah Janzen miho conoci como “Shady” pa e tambe por a biaha Hulanda y haya su tratamento medico necesario pa combati Von Willebrand Syndrom, despues na februari nan a haci e “Koffie di Speransa” pa un otro hobencita por haya un rolstoel cu danki na e evento ey el a hay’e.

Winterdaal a expresa cu nan ta haya hopi peticion durante henter aña pa nan por yuda diferente instancia of causanan ya cu Winterdaal ta conoci como un persona cu ta gusta yuda comunidad y vooral e muchanan. Pa november proximo nan tin e campaña “Feed the kids day” unda nan ta traha 1.000 paki di pan cu hot dog, juice, buscuchi y mangel cu ta wordo parti pa 1.000 mucha den conmemoracion di Dia di Mucha y na december nan ta traha 50 pakete pa muchanan mas vulnerabel “Un man pa nos ruman”.

“Durante henter aña nos ta haci diferente eventonan sporadicamente, nos ta activo durante henter aña”, Winterdaal a menciona.

Manera ta conoci, dia 22 di juni e tata di Angelaine, Siegfried Fingal a realisa un conferencia di prensa conhuntamente cu Winterdaal pa trece dilanti informacion di su yiu muhe cu na e momentonan aki ta na Hulanda buscando tratamento medico pa su salud.

Tata di Angelaine a conta cu su yiu a bira malo na cuminsamento di december. Nan a hiba Angelaine dokter na unda nan a haci tur e testnan cu por a haci na Aruba pero nan no por a haya nada. Dokter di cas a bisa e famia cu nan por bay cas y pasa e dianan di Pasco trankil sabiendo cu tur cos ta bon.

Den luna di januari, dia 26 of 27, segun e tata a conta, Angelaine a cay na scol y ora el a busk’e na scol, e no a wak nada y Angelaine no a bisa nada. Pero ora el a yega cas atardi, nan por a ripara e rascanan cu el a cay y diripiente el a bay den e mesun fase cu el a bay aden na cuminsamento di december.

Na e momento ey e mayornan a hib’e eerste hulp y dokternan a interna Angelaine pa observacion y nan a manda su sanger pa Utrecht na Hulanda pa test. Angelaine a haci aña dia 31 y dia dos nan a haya e noticia cu e tin leukemia unda cu e siguiente dia e tabata den avion rumbo pa Utrecht pa ricibi su tratamento na Prinses Maxima Centrum. Actualmente e ta bayendo pa cinco luna caba cu e ta na Utrecht.

Fingal tambe a splica cu Angelaine ta respondiendo bon na e tratamento unda cu e ta haya diferente tratamento di kimoterapia. Tin biaha e ta hay’e via boca cu ta djis un pildo y otro biaha e ta haya inyeccion via un aparato cu ta den su curpa caba y di eynan tin dia e ta djis keda conecta, e nurse ta bin y ta inyect’e ora e ta drumi y e no ta sintie.

Pero otro tratamento di kimoterapia, cu ta mas duro, cu e ta hayando un biaha pa siman, eseynan si e ta si e ta sinti efecto manera problema di bay af, hopi dolor y sacamento.

Pa finalisa, cualkier yudansa ta bonbini y por haci donacion via Banco CMB cu e number 61250903 di GLW Foundation.

Nan como fundacion ta hopi contento di por yuda unda cu for di e dia cu e fundacion a wordo crea, Winterdaal a bisa cu e tin e pensamento di yuda, no solamente pa organisa concursonan di beyesa sino tambe pa haci eventonan pa mustra cu por yuda e comunidad unda nan a duna sosten na famianan caba cu fondonan den transcurso di añanan.

Igualmente, e mesun dia ey e candidatanan pa Miss Teen Aruba International 2022 a participa den recaudacion di fondonan den varios luga di e isla.