Despues di varios reunion den parlamento riba e topico di RWZI parlamento a pone un delegacion cu a haci bishita na e planta. Director di DOW Marlon Croes hunto cu Frank Benita y DerelLue a duna un splicacion y un bista di e situacion di e planta na bubaliplas, pa asina compronde e proceso cu ta tuma luga tur dia na e planta.
Pa Parlamentario Alvin Molina e bishita aki ta hopi importante awor tin un bista mas amplio y ta compronde e necesidad cu tin pa un inversion ta necesario. Actualmente ta papia di inversion di 16 miyon y 60 miyon florin pa Aruba tin un RZWI den un miho condicion. Pa e motibo aki mes e delegacion a haci un bishita y haya sa mas informacion cu por delibera riba dje.
E parlamentario por a mira cu nan propio bista, por ehempel na esun di Parkietenbos, con e proceso di filtracion di awa ta. Asina a constata cu e awa ta pasa den un proceso kimico pa saca tur e sushi pa e por wordo uza den agricultura. E awa ta keda purifica, pasando den tres tipo di proceso – mecanical, bacterial y UV – pa despues pone den e tanki di Santa Rosa cu tin riba e tereno.
No ta sin mas ta duna Agricultornan e awa. Riba e tereno mes tin mata di papaya, bacoba y banana, entre otro, cu ta test e awa riba dje. Despues cu testnan duna resultado bon, e awa aki por bay pa clientenan di Sta Rosa.
E delegacion di Parlamento tambe a bishita Dump di Parkietenbos, specificamente e facilidad di insinerado. Parlamentario Alvin Molina a keda impresiona pa e proceso di kima sushi, pero tambe e Arubianonan profesional cu ta traha riba e tereno aki. “Nos tin cu balora nan y haci bon uzo di nan. Mester uza e profesionalnan di Aruba en bes di busca expertonan di afo.
Banda di ricibi informacion for di e expertonan den Parlamento, ora cu reuni riba e tema, ta necesario pa bishita e sitionan mes tambe. Asina por haya e informacion real di ambos banda, tanto e splicacion y loke nan ta mira y haci e preguntanan necesario
