Cu un inversion di 50 miyon dollar, diaranson pasa a keda oficialmente inaugura Hyatt Place Airport Hotel, cu e presencia di varios mandatario, Minister Presidente Evelyn Wever-Croes, invitadonan special y su gerente general Martha Raven, kende a expresa cu esaki ta Aruba su prome hotel na concepto di Hyatt Place.
Minister di Labor, Glenbert Croes a comenta cu e ta hopi contento pa e confiansa cu inversionistanan a pone den Aruba pa desaroya y construi e hotel aki. Esaki ta trece un dinamica nobo pa e pais conforme e vision turistico y tambe ta e brug pa e region cu lo trece un balor agrega pa e mercado di e pais.
Di mesun manera, el a splica cu mas di 90% di e trahadonan di e hotel aki ta local, 42 di e 43 trahado specificamente.
Croes ademas a sigura cu den e vision cu Gobierno tin ta pa duna contratistanan local preferencia profesional pa hende local, loke Aruba no tin den experticio nan ta duna tur cooperacion pa trece di afo y loke nan kier tambe ta cu e hendenan siña di esaki. Ademas, el a sigura cu desempleo di hobennan ta halto y nan lo kier desaroya e talento di ofishi den e hobennan, pa nan por participa den e tipo di desaroyo aki.
Estefano Pellizzari, cu ta forma parti di un di e compania constructor di hotel, Preacero Pellizzari a informa cu e tin varios aña bishitando e isla y esaki tabata un oportunidad cu a presenta y cu el a mira di un forma innovador. Cu no ta un hotel di turismo so, sino cu tambe tabatin e expectativa di crea un hotel den e cual por cuminsa crece e parti economico. E parti cu ta cerca di aeropuerto tambe el a haya importante pa por haya crecemento.
Segun Pellizzari,el a bisa cu su compania Italiano tin inversionnan na Venezuela, Merca, y di Mexico. Di mesun manera el a confirma cu como constructor, e ta sigui kere den Aruba. Tambe el a duna di conoce cu nan tin planea pa sigui crece den e isla, por ehempel, e construccion di un etapa nobo di e hotel pa wak con esey ta bay y asina por sigui cu e inversion.
