Mario Reeberg a tuma nota di un caso cu recientemente nos matutino a trece dilanti unda cu tin un situacion di inhusticia tumando luga. Un ciudadano despues di un accidente di trafico cu a tuma luga na october 2015, ainda ta buscando su derecho pa e daño cu a keda atras di cual ni e persona cu a ocasiona e accidente y tampoco su seguro ta para responsabel.
Den e articulo, anterior a indica cu un persona casi a perde su bista por completo na un banda di wowo, pa cual te dia di awe e ta biaha y bay specialista pa haci tur locual cu por pa e por mira bon bek.
Sr. Reeberg profesional di seguro su funcion ta encera lesa y splica polisa di seguro y pa yuda hende cu tin problema cu seguro, sea cu cas a kima of awa a drenta den cas etc. Tur sorto di exigencia cu presenta na Aruba cu e cliente ta haya un contratiempo of e compania di seguro no kier reacciona y nan no kier paga locual cu nan mester paga entre otro.
30 file e luna aki
Segun Sr. Reeberg ta splica Bon Dia Aruba, pa e luna aki so, e tin 30 file, cual ta representa clientenan cu ta den un problema of otro cu exigencia di pago na e seguro. “Locual cu ta pasa ta cu, companianan di seguro a haci un estudio y a haya sa cu hende, na prome biaha cu bo bisa nan no, nan ta stop. Di 100% di hende cu nan bisa no, 10% so ta sigui y for di e 10% aki otro 1% ta haya algo, y nan ta haya algo no completo.” Esaki segun Sr. Reeberg ta pasa hopi biaha pa motibo di miedo, bo ta wordo intimida pa un compania di seguro cu ta grandi, batayon di abogado, of como nan no sa kico pa haci y e ora nan ta legomay. Anto e ora companianan di seguro ta probecha. “Director di un compania di seguro tin dos pechi, e ta sinta eynan pa maneha e fondo di esunnan sigura cerca dje cu supuestamente e mester paga di acuerdo cu e polisa, pero fin di aña, e mester tin ganashi pa e haci doño di su trabou contento, y e por haci esaki via di nenga di paga cliente cual ta e “conflicto di interes”
Ley anticua
Sr. Reeberg a bisa cu Dios gracia Aruba ta bay modernisa su ley, pasobra e ley ta data di 1838, e ta anticua. Sinembargo esaki no ta haci cu companianan di seguro por “get away” cu e comportacion aki, pero nan ta forsa bo si bo ta den un situacion asina, pa bay corte. Aruba tin un handicap den e area aki, como cu na Hulanda por ehempel tin un camara di seguro unda cu e huesnan sinta ta specialisa riba aspectonan di seguro, Aki na Aruba esey no ta e caso, pues tin ora ta bay corte of Corte Superior.
Otro casonan
Banda di accidentenan di auto, tin problemanan tambe cu seguro di cas of casonan den hospital cu a corta pia robes por ehempel. Segun Sr. Reeberg ta splica e tin un caso actualmente unda cu nan a duna un pashent un medicina mientras cu e tabata alergico pe, y e pashent a fayece.
Prevencion
A causa di esey. E viuda a keda desampara awo, pasobra ken ta bay cria e señora awo. Pues Sr.
Reeberg su trabou ta pa brinda ayudo na tur esunnan cu un situacion inhusto a pasa cu nan y nan no sa e camindanan pa nan cana y pa mustra nan e opcionnan di e camindanan cu nan por tuma. “E miho solucion ta pa preveni, pero na Aruba tin e custumber ainda cu ta bay pe mas barata y esun barata ta sali caro.
A puntra Sr. Reeberg con por haci pa preveni e ora. El a splica cu un polisa ta un contract, y e contract ey ta encera cierto obligacion y responsabilidad nan di ambos parti y si bo no sa lesa e polisa, nan por tuma bo haci, y companianan di seguro ta gusta haci esey. Por ehempel un compania di seguro ta indica cu nan ta sigura contra daño di awa. Cu letter masha diki y grandi den e polisa. Locual cu nan no ta bisa bo ta cu mas leu den e contract tin para cu si e ta daño wordo causa pa awa di lama. Pues cu otro palabra, si bo cas ta yen cu lodo, piedra etc., pasobra un rooi a bay over y awa a drenta bo cas, ora cu bo bay exigi bo derecho, nan ta bisa bo cu e no ta awa di lama, y asina nan ta gara hende, Sr. Reeberg a splica.”
Awo na Aruba tur compania grandi ta exigi di contratista un seguro di “aansprakelijkheid” 1 miyon dollar (of mas) cual ta obligatorio, sino no ta drenta e compania. Esaki ta pa por si acaso kibra algo cu ta traha riba dje, y e ta cubri e daño ey. Tur contratista ta cera e seguro caro aki, tur hende ta haya copia y nan ta kere cu nan ta safe. Pero pa nan sorpresa, tur e seguronan aki tin e mesun excepcion, cual ta exclui e trabou cu e tin den su man. Pues un homber ta trahando na e boiler di WEB, e boiler a rementa pasobra el a haci un fout, e ta bay seguro pa exigi pago di daño y ta haya sa cu e no ta cubri.
Letternan chikito den contract
Bon Dia Aruba a puntra Sr. Reeberg, con un persona por ta mas alerta e ora pa e tipo di informacion scondi nan aki den contract prome cu nan firma, y no na momento di exigi pago. El a bisa cu esey ta su trabou, e ta wak e polisa y ta lesa esey pe persona y ta splica kico tin para den e contract y ta bisa kico ta pasa cu e persona si algo pasa. Tambe den caso cu hende ta paga di mas pa un seguro. Sr. Reeberg ta analisa e situacion y posibilidad pa cierto dañonan tuma luga den diferente scenario pa mira si e seguro cera ta realistico, el a conclui.
