Ayera 10 partido politico a postula nan candidatonan p’e eleccion 2017. 9 lista a wordo entrega den un sesion special di Conseho Electoral como cu UPP y PPA a dicidi di entrega un lista hunto. Segun polis y Conseho Electoral e evento a bay den trankilidad.

Vocero Lito Laclé: “10+ nos a score. El a bay tremendo. Pueblo, e partidonan y nan simpatisantenan a comporta manera debe ser. Tur hende a bay cas contento, celebrando y nos ta celebra cu nos tabatin niun detencion. Na final di cuenta for di 11or tabatin 175 polis riba pia, dus trahando te 4or y un tiki mas laat te ora cos ta bay trankilo.”

Presidente di Conseho Electoral Glenn Thodé ta refleha algo prome di 4’or atardi: “ El a bay manera nos a spera y desea y soña. Nos a pensele bon. Nos a pensa nos kier a eleva e ambiente na un luga di un aparencia cu cachet unda tanto e partidonan por briya y e pueblo por wak via e camaranan presente con e ta bay. Y nos a haci nos trabou den trankilidad tambe akiden, controla e documentacion, adapta y guia caminda tabata necesario. Anto na final di dia nos kier bisa cu e ta un dia exitoso. Pasobra tur e partidonan cu nos tabata sa cu nan lo bay presenta, nan tur a haya e oportunidad pa entrega nan lista. Y nan tur a cumpli cu e parti legal.”

Nos a puntra e presidente atrobe riba e schedule. Manera conoci UPP a desvia di esaki pa motibo cu na ultimo nan a dicidi di autorisa PPA pa entrega e lista cu candidatonan di ambos partido. Y algo mas discuti, e decision di AVP pa enbes di mainta, bin atardi 3.30 pa entrega nan lista. Na final nos por mira cu esaki tampoco a causa problema, ni pafo riba e cayanan unda e parada grandi di e partido den gobierno a sali for di Veld di Cricket na Vondellaan via Wilhelminastraat pa Censo.

Bon Dia Aruba sinembargo kier sa di e presidente di Conseho Electoral cu awor cu esaki no a causa problema, cu otro biaha mas partido lo sigui e ehempel di AVP pa nan mes fiha e orario di entregamento. “Esey semper tabata posibel, e tabata posibel e eleccion aki y por ta posibel otro eleccion. Nos ta kere: kisas ta bon pa adapta e ley riba e punto aki. Nos no ta kere e ta bon cu partidonan ta bin ora nan tin gana. Y tur por tin e gana di bin na mesun momento. Y e ora ken ta bay haya preferencia of no, esaki lo bira partidario. E organo aki prescribi pa ley mester funciona los di e partidonan, independiente di gobierno y Staten. Nos ta den posicion pa orden e schedule los di deseonan cu por ta deseonan di campaña. Ami ta kere cu nos tin e autoridad aworaki caba pero bo mester wak tambe con leu bo ta bay hiba un disputa riba esaki. Y e ley ta duna e espacio ainda pa aparece te 4or”, segun sr. Thodé.

Pues un partido por bin te na ultimo ainda pa entrega su lista. Pa e motibo ey ora AVP a entrega su lista, e Conseho a keda warda te 4or exacto pa cera nan sesion. Pasobra despues di e partido berde, tabata posibel cu mas partido por a presenta ainda. Aunke nan no tabata riba e schedule. Sr. Thodé ta splica: “Mayoria di e partidonan aki ta esunnan cu a participa na eleccionnan anterior.” E presidente cu ta referi na e website di Censo unda por haya e lista. Bon Dia Aruba a wak riba e lista aki cu ta trata di partidonan cu den pasado a participa den eleccion, manera MPA, Aliansa Democratico Arubano y tambe Democracia Real, e partido ‘bieu’ di Andin Bikker. Sinembargo ora 4or a bati y a cera e sesion, nos a mira cu el a keda na e 10 partidonan riba e schedule finalmente.

Firma di sosten
Nos remarca tambe cu ainda e partidonan mester haya suficiente sosten pa nan listanan pa por participa berdaderamente na e eleccion riba 22 di september. Esaki no ta conta pa partidonan cu ya ta representa den parlamento, esta AVP y MEP (PDR tambe pero nan no a entrega un lista). For di dialuna e otro 8 partido tin 7 dia di trabou (te cu 15 di augustus) pa logra di haya 578 firma necesario. Tur persona cu tin e derecho pa voto por bay firma.

Cobertura Bon Dia
Riba nos Facebook por haya tur e videonan di e entregamento di e listanan y entrevistanan cu diferente candidatonan y tambe cu publico y simpatisantenan. Mas potret di e ambiente di ayera por haya tambe riba pagina 31 y pagina 32 di e edicion aki. Conseho Electoral ainda mester controla e validez di e listanan.