Forum anonimo online, 8chan a reaparece bou e nomber 8kun, despues di bay offline na cuminsamento di augustus, despues di un tiramento masal na El Paso, Texas. E regreso di e forum, manera reporta anteriormente pa Gizmodo, a wordo anuncia luna pasa, ora e cuenta di Twitter di 8chan a revela e nomber nobo.
E Twitter di 8chan a nota durante weekend cu lo continua trasladando e ‘boards’ for di e pagina bieu, cu 63 board publico activo ayera.
Jim Watkins, doño di 8kun y 9chan, a subi un video riba YouTube ayera. Den e video, Watkins a bisa cu trafico di 8kun tabata ya caba mas di locual a spera.
“Ta un cantidad fantastico di usuarionan kende a purba di haya acceso na un momento”, el a bisa den e video. “Maske mi a spera retraso y atakenan, ta casi na e punto caba unda ningun persona, corporacion of gobierno por silencia nos. Te ora e trompet sorprendente ey zona,ta probabel cu e movemento aki lo bira imparabel.”
Servicio di siguridad cibernetico y entrega di contenido pa e pagina lo ser maneha pa Vanwa Tech, basa na Vancouver, Washington. Dia 30 di october ultimo, CEO di Vanwa Tech, Nick Lim a tweet tocante lansamento di e pagina. “Mi ta sigur cu e team di hende operando 8kun a haci mehoracion significante na e naturalesa operacional, y moderacion di nan website nobo”, Lim a bisa. “Libertad di expresion, internet, habilidad di comunica liber y legalmente, ta algun di e cantidad di pilar cu ta sirbi como e fundeshi pa e exito di Merca, pasado, presente y futuro.”
A registra 8kun dia 7 di september cu Tucows, un di e registrar di domain mas grandi di mundo, basa na Toronto.
Ainda ausente di 8kun ta e board ‘/pol/’, unda e supuesto tirado a post un mensahe odioso prome cu e tiramento dia 3 di augustus unda 22 persona a perde nan bida y 24 a resulta herida na un Walmart na El Paso.
Plataformanan di siguridad Cloudfare y Voxility a retira nan sosten di 8chan despues di e tiramento, efectivamente forsando e pagina pa ‘go dark’.
E pagina nobo ta adverti hende pa no post contenido ilegal na Merca, notando cu lo elimina esaki y esun cu post e, lo ser prohibi. Administradonan di e pagina no a contesta inmediatamente na un peticion pa comentario.
