Segun resumen di ayera di Departamento di Salubridad Publico DVG relaciona cu pandemia di Covid-19, ayera tabatin 874 caso activo di e malesa causa pa e virus SARS-CoV-2.
DVG a informa cu ayera tabatin 36 persona a recupera, mientras a registra un total di 107 caos nobo, di cual 10 ta turista y 97 ta residente di Aruba. E cifranan aki ta representa un tasa di positividad entre nos residentenan di 30%. Cantidad di casonan activo di COVID-19 pa awe ta 874 y cantidad di fayecidonan relaciona cu COVID-19 ta 111.
Segun DVG, e datonan ta ilustra aumento continuo di casonan nobo cu un averahe semanal di 106 caso pa dia y un averahe di tasa di positividad semanal di 32% pa dia, cu ta sigui aumenta.
Ademas, tin 36 persona interna den Hospital Dr. Horacio Oduber pa ricibi tratamento pa complicacionnan di Covid-19. Di esakinan, seis ta den Unidad di Cuido Intensivo (ICU), 28 ta riba piso general, y 2 ta riba piso di maternidad.
Datonan di hospital ta ilustra cu di e 36 personanan ingresa cu Covid-19, 4 ta no-AZV dus ta turista of ilegal, 8 ta vacuna y 24 no ta vacuna.
