Ayera, Departamento di Salubridad Publico DVG a duna un actualisacion riba e desaroyonan di pandemia di Covid-19 na Aruba, den cual a indica cu a nota un aumento grandi den e casonan di Covid-19 den ultimo siman.
Segun DVG a informa, actualmente tin 87 caso activo di Covid-19, e malesa causa pa e virus SARS-CoV-2, di cual 37 ta residente di Aruba mientras 50 no ta residente. Asina por nota cu e cantidad di caso positivo ta mas entre e no-residentenan.
Sinembargo, DVG den su actualisacion di ayera no a duna mas informacion, por ehemplo, e tasa di positividad, e cantidad di caso cu ta di e variante Delta, of e cantidad di test cu a haci, manera si tabata informa antes cu e update diario. Manera a informa, DVG awo ta duna solamente un update semanal, y den esaki, ayera a laga hopi informacion afo.
Segun portal online NoticiaCla, Crisis Team a splica cu ‘aunke no-residentenan ta test positivo na Aruba, no ta registra nan como casonan local sino como di afo, debi cu nan a bin cune di afo, y ta simplemente e virus a desaroya durante e periodo di incubacion’ mientras nan tabata na Aruba. Pues, door cu nan no a contagia na Aruba mes sino cu a bin cu e virus for di exterior, ta registra nan como no-residente.
Mientras tanto, prome minister Evelyn Wever-Croes a indica cu di e casonan positivo, alrededor di 85 porciento ta persona cu no a vacuna y 15 porciento ta persona cu si a vacuna. Mirando e desaroyonan local como tambe den exterior, por ehemplo na Hulanda, ta recomenda pa tur ciudadano tuma responsabilidad pa nan salud y sigui practica protocolnan pa evita contagio, manera uso di tapaboca, laba man y usa hand sanitizer, y tambe mantene un distancia di 1.5 meter for di otro persona unda cu ta posibel.
