En conexion cu e celebracion di dia Internacional di Felicidad, dia 20 di maart cu a pasa, Oficina Central di Estadistica (CBS) ta publica su Encuesta di Bienestar Social 2017 preliminar. Segun e encuesta, entre otro 84% di adultonan na Aruba ta sinti nan mes feliz.
E encuesta di Bienestar Social 2017 a conta cu e participacion di un total di 2012 persona adulto di 18 aña bay ariba. E resultadonan preliminar ta mustra cu 84% di e poblacion adulto a sintinan mes feliz e dia prome cu e encuesta. Esunnan cu a sintinan mes mas feliz tabata hende homber entre 18 y 24 aña di edad. Esunnan cu tabata sintinan mes menos feliz tabata hende muhe di 65 aña di edad of mas.
E datonan aki ta refleha e estado di felicidad di e poblacion di Aruba como tambe e relacion entre felicidad y e satisfaccion cu diferente area importante den bida., segun e comunicado di CBS.
Den e grafieknan adhunto por lesa e resultadonan cu a wordo obteni. Di esunnan cu a sintinan hopi feliz:
- 9% tabata hopi satisfecho cu nan bida familiar
- 7% tabata hopi satisfecho cu nan matrimonio of pareha
- 3% tabata hopi satisfecho cu nan tempo liber
- 1% tabata hopi satisfecho cu nan trabao (pa personanan emplea)
- 5% tabata hopi satisfecho cu nan standard di bida
- 2% tabata hopi satisfecho cu nan salud
- 4% tabata hopi satisfecho cu nan participacion den e bida social normal
- 9% ta hopi satisfecho cu e balansa entre nan trabao y bida (pa personanan emplea)
E resultadonan final di e Encuesta di Bienestar Social 2017 lo wordo publica dentro di poco pa CBS. Den e publicacion aki, lo wordo haci un analisis profundo di tur e areanan relata cu e bienestar social di e poblacion di Aruba.
