E cantidad di hende cu a fayece a causa di yobida y avalancha a aumenta te na 84, desde januari te awor. E cantidad a subi despues di conoce cinco victima nobo den ultimo oranan, gobierno di Peru a informa.
Ultimo rapport oficial for di Instituto Nacional di Defensa Civil a indica cu tin un registro di 20 persona cu a disparce y 209 hende herida. Gobierno ta conta cu 111.098 persona damnifica cu a perde tur cos, y 666.534 cu a resulta cu un daño menor y cu 149.000 cas daña.
E caretera principal cu ta conecta Lima cu otro regionnan a keda blokea pa motibo di ascenso di riu Rimac diaranson marduga. Centenares di truck y bus a keda pega eynan. Gobierno a pone den funcionamento un caminda alternativo pa trafico di auto, nan a kita e rail di trein pa converti e tereno ey den un caretera temporal. “Nos lo bay retira e rail temporalmente y asina autonan por core riba e construccion ey, mientras nos ta drecha parti di e caretera cu a cay”, Gonzalo Tamayo, Minister di Energia y Mina a splica.
Diaranson a bin un yobida fuerte na region di Piura, na norte di Peru y a inunda centenares di cas den e sector ey. E awacero a prolonga pa varios ora, pa tal motibo e awa a activa 21 rooi na sector di Tumbes y Trujillo, situa na norte di e pais. Huaico number siete a cay diaranson atardi riba ciudad di Trujillo, lagando 426 mil persona sin awa potabel, pasobra e canal Chavimochic a kibra un parti y a blokea e paso di awa. “Nos no tin awa ni pa bebe, y tampoco pa laba nos paña of pa nos dal un baño”, Karina Llaro, poblador a bisa.
Awacero a destrui hopi brug y tereno di cultivo, pa tal motibo hopi campesino ta solicita yuda di banda di gobierno. E calentamento di awa di oceano pacifico na norte di Peru a origina e fenomeno miho conoci como Niño Costero, cu yobida, deslisamento y derumbe di riu. E magnitud di awacero ta parce e awacero di e fenomeno di El Niño 1998, specialistanan a splica.
Na 1982 – 1983, inundacion y epidemia cu e fenomeno El Niño a causa, a laga 9000 morto na Peru. Producto interno bruto (PIB) a cay 11,6%. Na 1997 – 1998 a registra 500 hende cu a fayece y un disminucion di PIB di 6%.
