Cientificonan conservacional di diferente parti di mundo cu a traha riba temanan cu ta integra e obhetivonan pa pone un balans den biodiversidad, ta manda un carta di preocupacion dirigi na gobierno di Aruba relaciona cu proteccion di nos naturalesa. Ta pone enfasis riba e caynan na San Nicolas unda ta broei parhanan marino cual ta importante pa conservacion di biodiversidad di henter e planeta.

E carta ta dirigi na Prome Minister di Aruba, Conseho di Minister, Presidente di Parlamento como tambe miembronan di Parlamento di Aruba y Gobernador di Aruba. E cientificonan conservacional aki ta traha riba e necesidadnan ecologico cu tur persona ta rekeri; manera aire limpi, awa limpi, siguridad y cuminda saludabel cu tin prosperidad y sostenibilidad duradero.  Recientemente gobierno di Aruba a haci un adelanto den mehoracion di e componente di fuente di energia renobabel den e cartera di energia di Aruba. Esaki a wordo haci pa un maneho di residuonan municipal, desecho residual y reservanan di awa, den e forma cu ta fomenta e hotelnan y otro parti di e sector turistico. Naturalmente den nan propio adopcion di tecnologia responsabel y sostenibel cu nan miho practica, cual segun e cientificonan esaki ta algo di admira. Sin embargo, un obhetivo critico cu semper tabata e parti centrico di e sostenibilidad berdadero ta e mantencion continuo di biodiversidad.  Esaki ta encera e proteccion di e flora y fauna local original riba e nivelnan cu ta garantisa un probabilidad halto di sobrevivencia riba largo plaso. E bestia y matanan nativo di un region ta finalmente un parti di e herencia historico natural di un luga. E prome generacion di Arubiano, tanto indian y despues di e otro culturanan a confia den naturalesa.

Reconocemento mundial
E perdida y deterioro di diferente mata y bestia ta sirbi como indicado di e cambionan negativo den e medio ambiente. Esaki ta señala impacto cu finalmente lo afecta tambe e populacion humano segun observacion di e cientificonan. Un di e caracteristicanan di biodiversidad incomparabel y mas importante globalmente di Aruba ta e caynan. E caynan ta e lugar di broei pa e parhanan marino dilanti di e costa na San Nicolas. Nan ta provee te cu dies diferente especie di parha marino tropical, mes tanto cu 10.000 par di neishi. Esaki ta un di e poblacionnan reproductor mas diverso y congestiona pa e parhanan aki den region di e parti sur di Caribe anto realmente esun mas significante di e islanan cual tabata forma Antiya Hulandes. Pa e motibo aki, e islanan a haya reconocemento mundialmente pa ‘Bird Life International’ como areanan oficialmente importante pa parha y nan importancia ta bon documenta den varios publicacionnan. Parhanan marino no por broei si e caynan ta wordo utilisa pa hende of si tin disturbio den e awanan cerca di nan. E cientificonan ta enfatisa cu:  “Sin un esfuerso serio di parti di gobierno di Aruba pa gestiona y minimalisa e entrada di hende, sigura e trankilidad di e caynan (cu ta neishi pa parha marino) Aruba seguramente lo perde un di su caracteristicanan natural unico y mas importante.”


Tres punto di accion
Pa Aruba sigui haya reconocemento, manera ta e caso, pa su practicanan di sostenibilidad inovativo na nivel mundial, gobierno di Aruba tin cu adopta anto insisti den un plan serio. Esaki segun e carta di e cientificonan:  “mester ta un plan conhuntamente regla pa reconoce e caracteristicanan crucial di diversidad biologico pa haya maneranan creativo pa proteha nan pa semper.” Den caso di e caynan, unda e parhanan marino ta broei na San Nicolas, ta sugeri tres accion inicial necesario:

1. Declara e cinco caynan na San Nicolas oficialmente como areanan protegi riba nivel nacional, cu lo no ta accesibel pa ningun forma di desaroyo humano.
2.Cera e awanan rond di e caynan pa tur forma di uzo humano, excepto pa investigacion y pa monitorea durante e temporada di broei den lente-zomer, na un distancia grandi cu por asegura cu no ta stroba e parhanan cu ta broei.
3.Dispone di un presupuesto pa contrata y ta ekipa cu boto y otro ekipo riba un base anual.
Ideal lo ta cuater (si no dos) cuidado di cay (bao auspicio di Parke Nacional Arikok) pa cuida e caynan contra intruso y disturbio humano cu autoridad di duna boet. Habitantenan tambe
por yuda monitorea y yuda den e investigacon di e parhanan segun cu ta necesario of desea.