Archivo Nacional Aruba mediante un publicacion riba su rednan social a recorda e fecha 16 di februari na unda cu 81 aña pasa Aruba a wordo confronta directamente cu guera mundial ora a bin un atake riba e isla.
Den un publicacion, Archivo Nacional Aruba a menciona cu nan tin disponibel riba nan website https://coleccion.aw/guera diferente informacion relevante como por ehemplo potretnan ora un torpedo a yega na e pier di Eagle Beach dia 16 di februari di 1942 e cual a wordo tira pa U-156 for di Arkansas, e artefacto aki a wordo inspecciona pa ehercito Hulandes y Mericano manera e capitan Robert Bruskin, despues cuater marinier a muri ora e torpedo a explota na momento cu nan tabata purba desarm’e.
Den Archivo tambe tin diferente publicacion tocante Segundo Jorge Adelberto (Boy) Ecury ken tabata un Arubiano miembro di e resistencia Hulandes den e segundo guera mundial. Ecury hunto cu su miho amigo Luis de Lannoy y Delfincio Navarro nan tabata comunica den idioma papiamento a traves di cartanan y nan a realisa atakenan contra trucknan Aleman cu tabata carga cu bombanan, nan a saca treinnan for di nan caminda, entre otro accion cu nan a haci na Den Haag y cu un edad di hoben di 22 aña a entrega su bida pa awendia nos tin e libertad.
Igualmente por mira diferente aporte cu Sr. Dufi Kock ta duna na historia di Aruba recordando e temponan di guera na unda e ta conta manera riba 10 di mei di 1940 ora forsa Aleman a invadi Hulanda y e esun anochi e capitan Ferdinand Schmidt a sink su barco E.S Antilla na Malmok pa no entreg’e na militarnan Hulandes.
Esaki y otro historianan di segundo guera mundial cu ta hopi interesante ta riba e website di Archivo Nacional na unda esnan interesa por busca nan y haci uso di dje, como por ehemplo scolnan pa muchanan haya sa un tiki mas di e tempo aki.
